बागलुङ — बडिगाड गाउँपालिकाबाट धौलागिरि अस्पतालका लागि ल्याइएकी कोरोनाका बिरामी सदरमुकाम नजिकैको बोक्सेमा ३ घण्टासम्म अलपत्र परिन् ।
सडकमा खसेको पहिरोले अवरुद्ध भइरहने, तर खुलाउने प्रयास नहुने कारणले बिरामीले सास्ती खेप्नुपरेको हो । बल्लबल्ल ल्याएर अस्पतालमा भर्ना गरेको १२ घण्टा नपुग्दै बिरामीको मृत्यु भयो । ‘समयमा ल्याउन सकेको भए उनको ज्यान जोगिन सक्थ्यो,’ अस्पतालका मेसु डा. शैलेन्द्र पोखरेलले भने, ‘समय घर्केर आएका बिरामीको ज्यान गइरहेको छ ।’
मध्यपहाडी लोकमार्गअन्तर्गत सदरमुकामदेखि अक्षेतेसम्मको ७ किमि सडक खण्ड क्षतविक्षत छ । यहाँ सवारीसाधन फसेर घण्टौं जाम हुन्छ । त्यसका लागि यात्री, सवारीसाधनका चालक र सहचालक मिलेर हिलो पन्छाउने र जसोतसो उम्कने प्रयास मात्रै हुने गरेको छ । मध्यपहाडी लोकमार्ग आयोजनाले दशकदेखि वर्षात्को समस्या समाधानमा कुनै पहल नगरेको पश्चिम बागलुङका जनप्रतिनिधिले टिप्पणी गरे । ‘हरेक वर्ष हामीले यो सास्ती भोगिरहेका छौं, कहिले पनि समाधान नहुने भयो,’ निसीखोला गाउँपालिकाका अध्यक्ष तारानाथ पौडेलले भने । चार घण्टासम्म सडक नखुलेको र पैदल यात्रा गरेर जाने ठाउँसमेत अभाव भएर सास्ती भोगेको उनले बताए ।
दोबिल्ला, अक्षेते, खहरे र बिहुँको इनारपानीसम्म सडक क्षतविक्षत र हिलाम्मे छ । दर्जनौं पहिरो पन्छाइएको छैन । ठेक्कामा लिएको सिद्दिसाई भारत संयुक्त निर्माण कम्पनीले केही स्थानमा मात्रै नाली बनाएको छ । केही स्थानमा गिट्टी थुपारेको छ । तर सबैभन्दा जोखिम र हिलाम्मे खण्डमा कामै नगरेपछि बर्सेनि स्थानीयले सास्ती खेप्दै आएका हुन् । ‘मैले २० वर्षदेखि यो सडकमा यत्तिकै सास्ती खेपिरहेको छु,’ गलकोट नगरपालिका–३ का फमबहादुर खत्रीले भने, ‘राज्यको लापरबाहीले ठेकेदारले पनि जनतामाथि ज्यादती गरिरहेका छन् ।’ पश्चिम बागलुङका अधिकांश जनताले ७ किमि सडकको कारण सास्ती खेपेका हुन ।
गत वर्षात्मा पनि गलकोटबाट प्रसूति व्यथाले च्यापेर आएकी एक महिला पहिरोमा फसेपछि स्वास्थ्यकर्मी पैदलै पहिरो गएको स्थानमा पुगेर एम्बुलेन्समा सुत्केरी बनाएका थिए । ‘रातिको समयमा कोही बिरामी भयो र यो बाटो ल्याउनुपरेमा मर्नुपर्ने अवस्था छ,’ बडिगाड गाउँपालिकाका सवारी चालक राजन पाइजाले भने, ‘सामान्य सडक जस्तो बनाइदिन कसले रोकेको होला ?’
प्रकाशित : असार १३, २०७८ ०९:५३
