प्रसारण लाइनका विषयमा पूर्वी नवलपरासीमा विवाद, स्थानीयमाथि प्रहरीको धरपकड- गण्डकी - कान्तिपुर समाचार

प्रसारण लाइनका विषयमा पूर्वी नवलपरासीमा विवाद, स्थानीयमाथि प्रहरीको धरपकड

कान्तिपुर संवाददाता

पूर्वी नवलपरासी — विद्युत् प्रसारण लाइनमा अवरोध गरेको भन्दै पूर्वी नवलपरासीको विनय त्रिवेणी गाउँपालिका २ मा प्रहरीले स्थानीयलाई धरपकड गरेको छ । स्थानीयलाई जानकारी नदिएर व्यक्तिगत जग्गामा प्रसारण लाइनको पोल गाड्न लागेको भन्दै स्थानीयले विरोध जनाएका थिए ।

स्थानीयले आयोजनाको विषयमा सार्वजनिक सुनुवाइ नभएको, प्रभावित व्यक्तिलाई जानकारी नगराएको भन्दै पोल गाड्न रोकेपछि प्रहरीले बल प्रयोग गरेको थियो ।

प्रहरी र स्थानीयबीच तनाव उत्पन्नभएको थियो । झडपको अवस्था सिर्जना भएपछि प्रहरीले तीन जना स्थानीयलाई नियन्त्रणमा लिएको छ ।

जिल्ला प्रहरी कार्यालय पूर्वी नवलपरासीका डीएसपी दिलिपकुमार गिरीले प्रसारण लाइनको काममा अवरोध गरेपछि तीन जना स्थानीयलाई नियन्त्रणमा लिएको बताए । तर स्थानीयले भने प्रहरीले अनावश्यक बल प्रयोग गरेको आरोप लगाएका छन् ।

यसैबीच नेपाल विद्युत् प्राधिकरणको हेटौंडा–भरतपुर बर्दघाट २ सय २० केभी प्रसारण लाइन आयोजना र पूर्वी नवलपरासीका विभिन्न स्थानका स्थानीयबीच देखिएका विवादप्रति नेपाल आदिवासी जनजाति महासंघ नवलपुरले ध्यानाकर्षण जनाएको छ ।

प्रकाशित : चैत्र २७, २०७७ १४:१४
प्रतिक्रिया
पठाउनुहोस्

राष्ट्रपतिबाट विभिन्न व्यक्तिलाई मानपदवी, अलंकार र पदक

रासस

काठमाडौँ — राष्ट्रपति विद्यादेवी भण्डारीले राष्ट्रका विभिन्न क्षेत्रमा योगदान पुर्‍याएका व्यक्तिहरुलाई शुक्रबार राष्ट्रपति भवन शीतल निवासमा आयोजित समारोहमा विभिन्न मानपदवी, अलंकार र पदकबाट सुशोभन गरेकी छन् ।

विभूषित हुनेमा महाउज्जवल राष्ट्रदीप प्रथम श्रेणीबाट स्व मदनमणि दीक्षित, पूर्वमन्त्री स्व रवीन्द्रप्रसाद अधिकारी, सुप्रसिद्ध प्रबल जनसेवा श्री (प्रथम) बाट प्रधानन्यायाधीश चोलेन्द्रशमशेर जबरा, चिकित्सक प्रा डा दिव्यासिंह शाहलगायत छन्। यस्तै सुप्रसिद्ध प्रबल जनसेवाश्री (प्रथम) बाट चिकित्सक डा सन्दुक रुइत, प्रसिद्ध प्रबल जनसेवाश्री (द्धितीय) बाट सर्वाेच्च अदालतका न्यायाधीश दीपककुमार कार्की, अख्तियार दुरुपयोग अनुसन्धान आयोगका पूर्वप्रमुख आयुक्त नवीनकुमार घिमिरे, प्रधानसेनापति पूर्णचन्द्र थापालगायत हुन् ।

नेपालको संविधानको धारा २७७ को उपधारा १ बमोजिम मन्त्रिपरिषद्को सिफारिसमा विभूषण प्रदान गरिँदै आएको छ । विभूषित हुनेहरुको सूची गृहमन्त्रालयको वेबसाइटमा समावेश गरिएको छ । गत वर्ष विभूषण समितको सिफारिसमा मानपदवीतर्फ महाउज्जवल राष्ट्रदीप प्रथम श्रेणीबाट दुई, सुप्रसिद्ध प्रबल जनसेवाश्री प्रथम श्रेणीबाट सात, उज्जल कीर्तिमय राष्ट्रदीप द्धितीय श्रेणीबाट एक, प्रसिद्ध जनसेवाश्री द्धितीय श्रेणीबाट एक, सुकीर्तिमय राष्ट्रदीप तृतीय श्रेणीबाट नौ, सुप्रबल जनसेवाश्री तृतीयबाट ११२, कीर्तिमय राष्ट्रदीप चतुर्थ श्रेणीबाट आठ, प्रबल जनसेवाश्री चतुर्थबाट २०० जना छन् । प्रबल जनसेवाश्री चतुर्थबाट कलाकार निखिल उप्रेती, गायक धिरज राई, साहित्यकार श्रवण मुकारुङ लगायत छन् । जनसेवाश्री प्रथमबाट ११०, अलंकार तर्फ १५५ र पदकतर्फ २८ गरी ६३३ लाई विभूषित गरिने घोषणा भएको थियो ।

संविधान दिवस तथा राष्ट्रिय दिवस, २०७६ का अवसरमा २०७६ भदौ ३१ को निर्णयबाट विभूषण प्रदानका लागि ४५० लाई घोषणा गरिएकामा कोभिड–१९ का कारण कार्यक्रम हुन नसकेका कारण सुशोभन हुन नसकेकालाई पनि शुक्रबारै सुशोभन गरिएको छ । शुक्रबार बाँकी रहेकालाई आउँदो वैशाख १ गते सुशोभन गरिनेछ ।

विभूषण ऐन, २०६४ को दफा ४ बमोजिम उपप्रधानमन्त्री ईश्वर पोखरेलको अध्यक्षतामा गृहमन्त्री रामबहादुर थापा, तोकिएका विज्ञ र गृहसचिव महेश्वर न्यौपाने सदस्यसचिव रहेको विभूषण समितिको बैठकले उक्त सिफारिस गरेको हो । गृहमन्त्रालयका प्रवक्ता चक्रबहादुर बुढाका अनुसार समितिमा प्रा डा मीना वैद्य, प्रा डा इन्द्रजीत राई, कलाकार हरिहर शर्मा, इञ्जिनीयर काशेन्द्रप्रसाद यादव, उपरथी विनोदकुमार श्रेष्ठ सदस्य रहेका थिए ।

प्रकाशित : चैत्र २७, २०७७ १४:०७
पूरा पढ्नुहोस्
प्रतिक्रिया
पठाउनुहोस्
×