वाग्मतीमा थप ६ मन्त्री र चार राज्यमन्त्री नियुक्त

केशवराज पाण्डे भौतिक पूर्वाधार, रचना खड्का आर्थिक मामिला तथा योजना, विजय सुवेदी समाजिक विकास, शान्तिप्रसाद पौडेल उद्योग, पर्यटन, वन तथा वातावरण, प्रदीपकुमार कटुवाल क्षेत्री स्वास्थ्य, डा. अजयक्रान्ति शाक्य आन्तरिक मामिला तथा योजना, चन्द्र लामा भूमी व्यवस्था कृषि तथा सहकारी मन्त्रीको रुपमा नियुक्त भएका छन् ।

यसअघि आन्तरिक मामिला मन्त्री रहेका पाण्डेलाई विस्तारित मन्त्रिपरिषद्मा भौतिक पूर्वाधार मन्त्रालयको जिम्मेवारी प्रदान गरिएको हो । शाक्यले सामाजिक विकास मन्त्रालयलाई फुटाएर स्वास्थ्य मन्त्रालय थप गरेकी हुन् । उनीहरुलाई प्रदेश प्रमुख यादव शर्माले पद तथा गोपनीयताको सपथ ग्रहण गराएका छन् ।

मुख्यमन्त्री शाक्यले जीवन खड्का भौतिक पूर्वाधार विकास, जुनेली श्रेष्ठ सामाजिक विकास, बद्री मैनाली भूमि व्यवस्था कृषि तथा सहकारी र जुनेली श्रेष्ठ सामाजिक विकास राज्यमन्त्री नियुक्त गरेकी छन् । उनीहरुलाई मुख्यमन्त्री शाक्यले शपथ ग्रहण गराएकी थिइन् ।

नेकपा एमाले औपचारिकरुपमा विभाजनपश्चात् गठन भएको नेकपा (एकीकृत समाजवादी) मा आफ्नो पार्टीका १३ सांसद आबद्ध भएसँगै शाक्य नेतृत्वको सरकार अल्पमतमा परिसकेको छ । मुख्यमन्त्रीको शपथ लिएसँगै दुई सदस्यीय मन्त्रिपरिषद् विस्तार गरेकी थिइन् । तर, उनले नियुक्त गरेको सामाजिक विकास मन्त्री कृष्ण खनालले नेकपा (एस) रोज्दै पदबाट राजीनामा दिएका थिए ।