सर्लाही — सर्लाहीका व्यवसायी एवं गोडैतास्थित उद्योग वाणिज्य संघका अध्यक्ष उपेन्द्र हजारी मृत फेला परेका छन् । हजारी शनिबार अपराह्न रहर रोपेको खेतमा मृत अवस्थामा फेला परेका हुन् ।

शुक्रबार साँझ गोडैता–७ स्थित घरबाट समान्य अवस्थामा हिँडेका हजारीको शव शनिबार अपराह्न रहर खेतमा लडेको अवस्थामा देखेपछि स्थानीयले प्रहरीलाई खबर गरेका थिए ।

४५ वर्षीय हजारीको मुखबाट रगत आइरहेको अवस्थामा शव फेला परेको प्रहरीले जनाएको छ । प्रहरी उपरीक्षक नरेशराज सुवेदीले घटनास्थलमा प्रहरी पुगेको जनाउँदै अनुसन्धानका लागि प्रदेश प्रहरी कार्यालयबाट तालिमप्राप्त कुकुर पनि मगाएको जानकारी दिए ।

उनले घटनाको अनुसन्धानमा प्रहरी जुटिसकेको बताए । ‘आज अपराह्न महिलाहरु घाँस काट्न गएका बेला शव देखेपछि हामीलाई जानकारी आएको हो, घटनाको अनुसन्धानका लागि तालिमप्राप्त कुकुर पनि मगाएका छौं,’ उनले भने । मृतकका परिवारले हिजो साँझ घरबाट बाहिर गएको र रातिदेखि नै मोबाइल स्विच अफ रहेको प्रहरीलाई जानकारी दिएको छ ।