मधेस प्रदेश कांग्रेस संसदीय दलको नेतामा कृष्णा यादव निर्वाचित
धनुषा — मधेस प्रदेश नेपाली कांग्रेस संसदीय दलको नेतामा कृष्णा यादव निर्वाचित भएका छन् । उनले प्रदेशका २२ सांसदमध्ये १८ मत पाए । प्रतिस्पर्धी रामसरोज यादवले ४ मत पाएको निर्वाचन समितिले जनाएको छ ।
रौतहटबाट प्रदेशसभामा निर्वाचित कृष्णा कांग्रेस मधेस प्रदेशका सभापतिसमेत हुन् । रामसरोज धनुषाबाट प्रदेश सांसदमा निर्वाचित भएका हुन् ।
दलको नेता चयनका लागि कांग्रेसको पार्टी कार्यालयमा बिहिबार मतदान भएको हो ।
नेता चयनका लागि चन्द्रशेखरकुमार यादवको संयोजकत्वमा निर्वाचन समिति गठन गरिएको थियो । यो प्रदेशमा कांग्रेस दोस्रो ठूलो दल हो । सरकार गठनको समीकरण फेरबदल भएपछि दलको नेता चयन गर्न केही ढिलाइ भएको हो । एक साता पहिले केन्द्रले तीन सदस्य निर्वाचन समिति गठन गरेको थियो ।
दलको नेता चयन भएका कृष्णा पार्टीको केन्द्रीय सभापति शेरबहादुर देउवा समूहका छन् ।
प्रकाशित : पुस १४, २०७९ १६:२९