ठाकुरलाई यादवको आग्रह- ‘फुटेर होइन‚ जुटेर अगाडि बढौं’- मधेस - कान्तिपुर समाचार

ठाकुरलाई यादवको आग्रह- ‘फुटेर होइन‚ जुटेर अगाडि बढौं’

सन्तोष सिंह

धनुषा — जनता समाजवादी पार्टी(जसपा) नेपालका अध्यक्ष उपेन्द्र यादवले मधेसको मत र जनमत विभाजन हुँदा मधेसी जनतालाई क्षति पुगेका कारण पार्टी एकता आवश्यक रहेको बताएका छन् । जनकपुरमा बुधबार आयोजित पत्रकार सम्मेलनमा अध्यक्ष यादवले जसपा पार्टी विभाजन भएर लोसपा बन्दा कसैलाई फाइदा नभई नोक्सान मधेसीकै भएको बताए ।  

‘जनता समाजवादी र राजपा मिलेर बनेको जसपाबाट महन्थ ठाकुर नेतृत्वमा निस्केको समूहबारे समीक्षा गर्ने समय आएको छ,’ अध्यक्ष यादवले भने, ‘पार्टी छाडेर के फाइदा भयो ? नोक्सान दुवैतिर भएको छ । फाइदा त कसैलाई भएको छैन; विभाजनको औचित्य छैन । भड्काउन षड्यन्त्र भएको छ । पार्टी फुट्दा न लोसपालाई हित भयो न मधेसी जनतालाई फाइदा भयो,’ उनले भने ।

‘खुल्ला हृदयले आग्रह गर्दछु कि हिजोको समीक्षा गरेर पार्टी फुटले कसलाई फाइदा भयो ? ’ यादवले भने, ‘जब कसैको हितमा भएन भने अझै समय छ, फुटेर होइन जुटेर अगाडि बढौं । जुटेर अगाडि बढ्न लोसपाका साथीहरू आए खुल्ला हृदयले स्वागत गर्न तयार छौं ।’ पाँचदलीय गठबन्धनको माध्यमबाटै प्रदेश र प्रतिनिधिसभाको निर्वाचनमा जसपा अगाडि बढ्ने यादवले बताए ।

गठबन्धबाट कसैलाई फाइदा, कसैलाई नोक्सान भए पनि गठबन्धनको निरन्तरताको पक्षमा हामी छौं,’ उनले भने । गठबन्धनले लोकतन्त्रमाथिको संकटबाट बचाएर अगाडि बढेको उल्लेख गर्दै प्रतिनिधि सभाबाट नागरिकता ऐन पारित गरेर नागरिकताबाट वञ्चित मधेसीका सन्तानहरूलाई नागरिकता उपलब्ध गराउने यादवले प्रतिबद्धता जनाए ।

प्रकाशित : जेष्ठ २५, २०७९ १०:३१
प्रतिक्रिया
पठाउनुहोस्

भारतमा बिजुली बेच्ने चौथो आयोजना बन्यो मर्स्याङ्दी

४ आयोजनाको २ सय ३४ मेगावट बिजुली भारतलाई बिक्री
कान्तिपुर संवाददाता

काठमाडौँ — नेपालले मंगलबार रातिदेखि मर्स्याङ्दी जलविद्युत् आयोजनाको बिजुली पनि भारतमा बेच्न थालेको छ । मर्स्याङ्दीसहित विभिन्न ४ वटा आयोजनाबाट ५६ सय मेगावाट आवर (करिब २ सय ३४ मेगावाट) बिजुली भारतमा बेचिरहेको नेपाल विद्युत् प्राधिकरणका प्रवक्ता सुरेश भट्टराइले जानकारी दिए ।

त्यस्तै, बिहीबारबाट मध्यमर्स्याङ्दी आयोजनाको बिजुली पनि भारतमा बेच्नका लागि आज बोलकबोलमा भाग लिन लागिएको उनको भनाइ छ ।

यसअघि नेपालले गत शनिबार रातिदेखि कालीगण्डकी आयोजनाको १४० मेगावाटसहित कुल १७७.७ मेगावाट बिजुली भारत निर्यात गर्ने थालिसकेको थियो । मर्स्याङ्दी थपिएसँगै करिब २ सय ३४ मेगावाट बिजुली भारत जान थालेको हो ।

नेपालले इन्डियन इनर्जी एक्स्चेन्ज’ (आईईएक्स) मा बिजुली बेच्नका लागि गतवर्ष कात्तिकमा अनुमति पाएको थियो । गतवर्ष त्रिशूली र देवीघाट जलविद्यु्त् आयोजनाको मात्रै बिजुली भारतले किनेकोमा अहिले मर्स्याङ्दी, मध्यमर्स्याङ्दी, कालीगण्डकी र लिखुसमेत गरी कुल ३६४ मेगावाट बिजुली किन्नका भारतले सहमति दिएको छ । लिखुको बिजुली बेच्नका लागि नेपालले अनुमति पाएको भए पनि बेच्न भने थालिसकेको छैन ।

नेपालले बिजुली बेच्न प्रस्ताव गरेका अरु तीन आयोजना माथिल्लो तामाकोसी, माथिल्लो भोटेकोसी र चमेलियाको बिजुली किन्नका लागि भने भारतले हालसम्म स्वीकृति दिएको छैन ।

केही समयअघि भारतबाट बिजुली नपाएर औद्योगिक ग्राहकको लाइन काटेको प्राधिकरणले अहिले फेरि भारतलाई बिजुली बेच्न थालेको हो । वर्षायाममा नेपालको बिजुली खपत नभएर खेर जाने अवस्था भएपनि हिउँदमा भने भारतबाटै आयात गर्नुपर्ने अवस्था छ ।

नेपालले गतवर्ष कात्तिक १७ गतेबाट ‘डे अहेड मार्केट’को अवधारणामा आईईएक्समा बिजुली बेच्न थालेको थियो ।

प्रकाशित : जेष्ठ २५, २०७९ १०:२५
पूरा पढ्नुहोस्
प्रतिक्रिया
पठाउनुहोस्
×