![](https://assets-cdn.ekantipur.com/uploads/source/ads/900-100-0252024112350.gif)
![](https://assets-cdn.ekantipur.com/uploads/source/ads/mastercreativegif900x100-0952024115624.gif)
मोरङ — प्रदेश १ मा सम्पन्न राष्ट्रिय सभा सदस्य निर्वाचनमा खुला र महिलातर्फ सत्तारुढ गठबन्धन विजयी भएको छ भने अल्पसंख्यक र अपांगतर्फ एमाले विजयी भएको छ ।
![](https://assets-cdn.ekantipur.com/uploads/source/ads/900x100-0762024075620.gif)
![प्रदेश १ को खुलातर्फ मत बराबर, गोलाप्रथाबाट गठबन्धन विजयी](https://assets-cdn-api.ekantipur.com/thumb.php?src=https://assets-cdn.ekantipur.com/uploads/source/news/kantipur/2022/third-party/pradeshone-2612022022622-1000x0.jpg&w=1001&h=0)
![](https://assets-cdn.ekantipur.com/uploads/source/ads/sathi-deposit-900-100-1262024124333.gif)
खुलातर्फ सत्तारुढ गठबन्धनबाट कांग्रेसका उम्मेदवार गोपाल बस्नेत र महिलातर्फ नेकपा (एकीकृत समाजवादी) की जयन्ती राई निर्वाचित भएका छन् । यस्तै अल्पसंख्यक तथा अपांगतर्फ एमालेका सोनाम ग्याल्जेन शेर्पा विजयी भएका छन् ।
खुलातर्फ बस्नेत र एमालेका गुरु बरालको बराबर मत आएपछि गोलाप्रथाबाट छिनोफानो गरिएको थियो । निर्वाचन अधिकृत तथा जिल्ला अदालत मोरङका मुख्य न्यायाधीश भरत लम्सालका अनुसार बस्नेत र बरालको समान ४ हजार ४८८ र राप्रपाका अमर बिष्टले १८८ मतभार प्राप्त गरेका हुन् । जसमध्ये ४ वटा मत बदर भएको लम्सालले बताए ।
यस्तै एमालेका शेर्पा ४ हजार ७३४ मतभार ल्याएर विजयी भएका हुन् । सत्तारुढ गठबन्धनका जनता समाजवादी पार्टीका उम्मेदवार हेमराज राईले ४ हजार ३६८ मतभार प्राप्त गरेको र ४ वटा मत बदर भएको लम्सालले बताए ।
महिलातर्फ सत्तारुढ गठबन्धनबाट उम्मेदवार भएकी नेकपा (एकीकृत समाजवादी) की राई ४ हजार ६९२ मतभार ल्याएर विजयी भएकी हुन् ।
एमालेको महिलातर्फ उम्मेदवार सुमित्रा भण्डारीले ४ हजार ३६२ र राप्रपाकी रन्जु प्याकुरेलले १२० मतभार प्राप्त गरेको उनले बताए । जसमध्ये तीन मत बदर भएको लम्सालले बताए ।
बुधबार बिहान ९ बजे सुरू भएको मतदान दिउँसो ३ बजे सम्पन्न भएको थियो । त्यसपछि लगत्तै मतगणना सुरू गरिएको थियो । लम्सालका अनुसार दुई जना स्थानीय तहका प्रतिनिधि र एक जना प्रदेश सांसद मतदानमा अनुपस्थित थिए । स्थानीय तहतर्फ २७० र प्रदेश सभा सदस्यतर्फ ९१ मत खसेको लम्सालले बताए ।
झापाको गौरीगंज गाउँपालिका प्रमुख बाबुराज श्रेष्ठ र विराटनगर महानगरपालिकाकी उपप्रमुख इन्दिरा कार्की मतदानमा अनुपस्थित भएका हुन् । श्रेष्ठ छोरीको विवाहका कारण उपस्थित हुन नपाएको बताएकी थिइन् भने कार्की स्वास्थ्यसम्बन्धी समस्याका कारण निर्वाचनमा मत खसाल्न आएनन् ।
उच्च अदालत विराटनगरले किर्ते कागजात मुद्दामा दोषी ठहर गरेदेखि फरार रहेकी एमाले सांसद गुलेफुन खातुन पनि मतदान गर्न आइनन् ।
प्रकाशित : माघ १२, २०७८ १९:११