प्रदेश १ का तीन स्थानीय तहलाई १५ थान ‘अक्सिजन कन्सन्ट्रेटर’ प्रदान- प्रदेश १ - कान्तिपुर समाचार

प्रदेश १ का तीन स्थानीय तहलाई १५ थान ‘अक्सिजन कन्सन्ट्रेटर’ प्रदान

लक्ष्मी गौतम

पाँचथर — पाँचथर‚ ताप्लेजुङ र तेह्रथुम जिल्लाका स्वास्थ्य संस्थालाई हङकङमा रहेका भूतपूर्व सैनिकहरूको संस्था एक्स गोर्खाज सर्भिसेज एसोसिएसनले १५ वटा अक्सिजन कन्सन्ट्रेटर उपलब्ध गराएको छ ।

एसोसिएसनले गैरआवासीय नेपाली संघ (एनआरएन) मार्फत पाँचथर जिल्लाका लागि ११ तथा ताप्लेजुङ र तेह्रथुमका लागि २–२थान अक्सिजन कन्स्ट्रेटर उपलब्ध गराएको हो ।

कन्सन्ट्रेटरको वितरण सोमबारदेखि नै सुरु गरिएको पाँचथरका सामाजिक अभियन्ता तेजकुमार कुरुम्वाङले बताए । उनका अनुसार पाँचथर सदरमुकाम फिदिममा सञ्चालित स्वास्थ्य संस्थाका लागि ४ र बाँकी ७ वटा स्थानीय तहका लागि १-१ थान अक्सिजन कन्स्ट्रेटर उपलब्ध भएका छन् । ती सामग्रीको वितरण सोमबारबाटै सुरु गरिएको कुरुम्वाङले बताए ।

पाँचथरको सदरमुकामसमेत रहेको फिदिम नगरपालिका र कुम्मायक गाउँपालिकालाई सोमबार नै सामग्री उपलब्ध गराइएको छ ।

प्रकाशित : माघ ३, २०७८ २०:२९
प्रतिक्रिया
पठाउनुहोस्

उच्च अदालत वीरगन्जका न्यायाधीशसहित २३ जनामा कोरोना संक्रमण

भूषण यादव

वीरगन्ज — उच्च अदालत जनकपुरको अस्थायी इजलास वीरगन्जमा कार्यरत एक न्यायाधीशसहित २३ जना कर्मचारीमा कोरोना संक्रमण पुष्टि भएको छ ।

उच्च अदालत प्रशासन शाखाका अनुसार संक्रमित हुनेमा न्यायाधीश सीताराम मण्डल, रजिष्ट्रार गजेन्द्र बहादुर सिंह, उपरजिष्ट्रार केशवप्रसाद पौडेल, ६ जना शाखा अधिकृत, ५ जना नायव सुब्बा, एक जना कम्प्युटर अपरेटर, तामेलदार, डिठ्ठा, आईटी सहायक, सवारी चालक र तीनजना कार्यालय सहयोगी रहेका छन् ।

प्रशासन शाखाले सर्वोच्च अदालतको आन्तरिक तथा जिल्ला प्रशासन शाखालाई सोमबार पत्राचार गरि न्यायाधीशसहितका २३ कर्मचारीमा कोरोना पोजिटिभ देखिएको जानकारी गराएको छ ।

शाखा अधिकृत जयनारायण रायले आइतबार र सोमबार गरिएको परीक्षणमा हालसम्म एक जना न्यायाधीशसहित २३ जना कर्मचारीमा कोरोना पोजिटिभ देखिएको बताए ।

‘३५ जनाले पीसीआर र एन्टीजेन परीक्षण गराएका थियौं । २३ जनामा पोजिटिभ देखिएको छ । अझै ६/७ जनाको रिपोर्ट आउन बाँकी छ,’ अधिकृत रायले कान्तिपुरसित भने ।

प्रकाशित : माघ ३, २०७८ २०:१८
पूरा पढ्नुहोस्
प्रतिक्रिया
पठाउनुहोस्
×