(विराटनगर) — मोरङको उर्लाबारी–मधुमल्ला–रवि सडकमा चरम लापर्बाही भएको भन्दै प्रतिनिधिसभा सदस्य घनश्याम खतिवडाले ठेकेदारलाई कालोसूचीमा राखेर कारबाही गर्न माग गरेका छन् ।

प्रतिनिधिसभाको बुधबारको वैठकमा विशेष समय लिएर बोल्दै उनले भने, ‘०७४ असारमा ठेकेदारले कालोपत्र गरेको सडक दसैंसम्म पनि टिकेन, ठेकेदारलाई कारबाही गर्नुपर्छ । ’ छोटो समयमै कालोपत्रे उक्किएर खाल्डैखाल्डा भएको उल्लेख गर्दै उनले काम अलपत्र पार्ने ठेकेदार उन्मुक्तिका साथ हिंडेको समेत बताए । निर्माणका काममा ठेकेदारहरूले गर्ने बहानाबाजी र लापर्बाही रोक्न उनले सम्बन्धित मन्त्रालयहरूको ध्यानाकर्षण समेत गराएको बताए । चार वर्षअघि कालोपत्रका लागि ठेक्का लागेको उर्लाबारी–मधुमल्ला हुँदै रवि जाने, पाँचथर र इलामसमेत जोड्ने यो सडक कालोपत्रेका लागि मधुमल्लासम्मको ठेक्का लागेको थियो । खतिवडाले भने, ‘बाटामा अहिले खाल्डैखाल्डा छन् ।’ सडकको बिजोग अवस्था हुँदा पनि गम्भीरता नअपनाइएको उनको गुनासो थियो ।

‘काम बिगारेर ठेकेदार उन्मुक्तिका साथ हिंडेका छन्, योजनाको फरफराक पनि छैन,’ उनले भने, ‘पाउनुपर्ने भन्दा बढी रकम भुक्तानी भइसकेको छ ।’ यसबारे अख्तियार दुरुपयोग अनुसन्धान आयोगमा मुद्दा पनि दर्ता भएको उनले जानकारी गराए । ‘सम्माननीय सभामुखमार्फत् अख्तियारलाई यहीँबाट उजुर गर्न चाहन्छु,’ उनले संसद्मा भने, ‘उर्लाबारी–मधुमल्ला सडक ठेक्का लिने ठेकेदारलाई अविलम्ब कारबाहीको घेरामा तानियोस् र कालोसूचीमा राखेर त्यो बाटो फेरि बनाउनका लागि वातावरण सिर्जना गरियोस् ।’

सडक खाल्डैखाल्डा भएकाले दिनहुँ दुर्घटना भइरहेको उनले संसद्मा जानकारी गराएका थिए । सांसद खतिवडाले केराबारी गाउँपालिलगायत उत्तरी मोरङका गाउँमा विस्फोट र चन्दा आतंक फैलाइएको भन्दै भरपर्दो सुरक्षा व्यवस्था गर्न सरकारसित माग गरे । ‘स्थानीय तहका कार्यालय भवनमा बम विस्फोट गराएर, चन्दा नदिएको नाममा वडा अध्यक्ष, सदस्य, गाउँपालिका अध्यक्ष, उपाध्यक्षहरूलाई तर्साउने कोसिस गरिएको छ,’ उनले भने, ‘केका लागि आगजनी र विस्फोट गराउने तत्त्व सक्रिय छ, सरकारको यसतर्फ गम्भीर ध्यान जानु जरुरी छ ।’

रमितेको मिक्लाजुङ डाँडा, केराबारीको जेफाले, धजे डाँडालगायत पर्यटक जाने क्षेत्रमा बम विस्फोट गराएर तर्साउने र निर्माण भइरहेका योजनालाई प्रभाव पार्ने काम भएको भन्दै उनले ध्यानाकर्षण गराए । त्यस क्षेत्रमा सुरक्षा व्यवस्थामा ध्यान दिन आग्रह गर्दै खतिवडाले मिक्लाजुङ, लेटाङ, केराबारीमा गस्ती गर्न जानका लागि स्थानीय प्रहरी चौकीमा उपयुक्त साधन नभएकाले त्यसको व्यवस्था गर्न पनि माग गरे ।

मिक्लाजुङको वडा १ रमितेमा, केराबारीको वडा २ सिंहदेवीको बिहीबारे बजारमा र लेटाङ नगरपालिकाको वडा ७ बारङ्गीमा जनपद वा सशस्त्र प्रहरीका पोस्ट व्यवस्थित गरेर सुरक्षाको प्रत्याभूति गर्नका लागि उनले गृहमन्त्रालयको ध्यानाकर्षण गराएका थिए ।