रामेछाप — मन्थली नगरपालिका–७ भटौलीका ७३ वर्षका शङ्ख माझी र ६९ वर्षीया विभा माझीको दैनिकी आज पनि उही छ । खेती किसानी, खोला, बर्खाको चिन्ता र अधुरा आशा बोकेरै उनीहरू दिन काटिरहेका छन् ।

फागुन २१ नजिकिँदै गर्दा रामेछापका ग्रामीण बस्तीमा चुनावी आवाज भन्दा मौन असन्तोष र निराशा नै बढी सुनिन्छ।फागुन २१ मा प्रतिनिधिसभा सदस्य निर्वाचन नजिकिँदै गर्दा पनि यो निर्वाचनले उनीहरूको जीवनलाई खासै छोएको छैन। अब निर्वाचन आउन १२ दिन मात्रै बाँकी छ । तर भोट हाल्ने दिन आइसक्दा पनि माझी दम्पतीमा निर्वाचनको खासै मतलब देखिँदैन । 

भटौलीकै ७५ वर्षीया धनमाया खड्का पनि उस्तै निराश देखिन्छिन्। 'यसभन्दा अगाडि के भयो, पछाडि के हुन्छ र हामीलाई उस्तै छ,' उनी भन्छिन्, 'अरू ठाउँमा विकास देखिन्छ, हाम्रो गाउँमा केही देखिँदैन।'

खानेपानीको समस्या अझै उस्तै छ। तामाकोशी नजिकै बगे पनि पानी पिउन गाग्री बोकेर हिँड्नुपर्छ। 'ट्याङ्की बनाउँछौँ, पानी तान्छौँ भन्ने मात्रै,' उनको गुनासो छ। उनका अनुसार गाउँमा तामाकोशीको पानी लिफ्टमार्फत तानेर गाउँमा धारा लैजाने भन्दै काम सुरु भएको धेरै समय भइसक्यो । तर योजना अझै पूरा हुन सकेको छैन ।स्थानीयहरूका अनुसार खानेपानी, सडक, शिक्षाजस्ता आधारभूत पूर्वाधार वर्षौंदेखिका उही एजेन्डा हुन्। तर बारम्बार दोहोरिने वाचा पूरा नहुँदा निराशा गहिरिँदै गएको मन्थली नगरपालिका–९ पुरानागाउँका राज श्रेष्ठ बताउँछन्। उनले भने, 'पटक-पटक भएका निर्वाचनमा जनतालाई धेरै सपना बाँडेकै हो । तर खासै परिवर्तन भएन । खानेपानी, सडक समस्या उस्तै जस्तै छन् । अन्य विषय त परका कुरा ।'