बिहान ७ बजेर १३ मिनेटको शुभ साइतमा रंगीचंगी कपडा झुन्ड्याइएको टुप्पोमा मयलको रुखको हाँगा बाँधिएको करिब ३२ फिट अग्लो बाँसको चीर ठड्याएका थिए । त्यसपछि चीरलाई परिक्रमा गर्दै त्यहाँ एकापसमा अबिर छ्यापी हर्ष र उल्लासका साथ होली खेल्न सुरु गरेका थिए । त्यस अवसरमा गुरुजु पल्टनले बन्दुक पडकाई बढाईं गरेका थिए ।

चीर उठाएको हेर्न वसन्तपुरमा स्थानीय र पर्यटकहरूको भीड लागेको थियो । ऋतुहरूका राजा वसन्त ऋतुको आगमनलाई नेपालीहरू त्यसरी नै एकापसमा रंग अबिर छ्यापी होली अर्थात फागु खेलेर स्वागत गर्ने परम्परा छ ।