८ लाख दर्शनार्थी र ४ हजार साधुसन्तको उपस्थिति रहने पशुपति क्षेत्र विकास कोषले जनाएको छ ।
काठमाडौँ — महाशिवरात्रिका दिन कम्तीमा आठ लाख दर्शनार्थीले पशुपतिनाथको दर्शन गर्ने अनुमान गरिएको छ । करिब चार हजार साधुसन्तहरूको उपस्थिति रहने पशुपति क्षेत्र विकास कोषले जनाएको छ ।
'दर्शनार्थीको अत्यधिक घुइँचो व्यवस्थापन गर्न चार वटा छुट्टाछुट्टै लाइनमार्फत दर्शनको व्यवस्था मिलाएका छौँ,' कोषका कार्यकारी निर्देशक एवं प्रवक्ता सुभाष जोशीले भने, 'सुरक्षा, स्वास्थ्य, सरसफाइ र ट्राफिक व्यवस्थापनमा विशेष ध्यान दिइएको छ ।'
पशुपति क्षेत्रमा प्रवेश गर्ने मुख्य नाका तथा मन्दिर परिसर वरिपरि पैदलमार्गको व्यवस्था गरिनुका साथै आपतकालीन सवारीका लागि छुट्टै मार्ग निर्धारण गरिएको कोषले जनाएको छ ।
महाशिवरात्रिका अवसरमा नेपाल तथा भारतलगायत विभिन्न देशबाट आउने साधुसन्तका लागि अस्थायी आवास, भोजन तथा सुरक्षा व्यवस्था मिलाइएको छ । उनीहरूलाई तोकिएको स्थानमा बसोबासको व्यवस्था गरी मन्दिर परिसरको अनुशासन कायम राखिने कोषले जनाएको छ ।
