गत सिजन पनि सुदूरपश्चिमले क्वालिफायर–वानमा जनकपुर बोल्ट्सलाई हराएर फाइनल पुगेको थियो ।

पराजित विराटनगरले भने अब क्वालिफायर–२ खेल्नेछ । त्यसमा उसको प्रतिद्वन्द्वी इलिमिनेटरको विजेता हुनेछ । इलिमिनेटरमा काठमान्डु गोर्खाज र लुम्बिनी लायन्स बुधबार खेल्दैछन् । जितका लागि १ सय ५६ रनको लक्ष्य पाएको विराटनगर १४.१ ओभरमा ७८ रन बनाएर अलआउट भयो । यससँगै सुदूरपश्चिमले लिग चरणमा विराटनगरसँग बेहोरेको एक मात्र हारको बदला पनि लिएको छ ।

विराटनगरका फाफ डु फ्लेसिस ३६ रन बनाएर स्कट कुग्लेनको बलमा दीपेन्द्रसिंह ऐरीले क्याच लिएपछि विराटनगरको एकोहोरा हार औपचारिकता मात्र बनेको थियो । उनी नै सर्वाधिक रन बनाउने खेलाडी रहे । ओपनरका रूपमा फ्लेसिसले २९ बलमा तीन चौका र एक छक्का प्रहार गरे । विराटनगरको सुरुआत राम्रो रहेन् र ओपनर साम हेजलेट इनिङ्सको पहिलो बलमै आउट भए । लगतै मार्टिन गुपटिल दुई रन बनाएर आउट भए ।

नरेन भट्ट पनि आफ्नो खाता खोल्न असफल रहे । यस्तोमा विराटनगर तीन रन बनाउँदा तीन विकेट गुमाएको थियो । स्कोरले ४२ रन छुँदा बासिर अहमद दीपेन्द्रसिंह ऐरीको बलमा उनीद्वारा नै समातिए । मिलन बोहराले लोकेश बमलाई पाँच रनको व्यक्तिगत स्कोरमा आउट गरेपछि विराटनगरले ५० रन बनाउँदा पाँच विकेट गुमाएको थियो । नारायण जोशी पनि एक रन मात्र बनाए आउट भए भने प्रतीश जीसीले रनआउट हुन अगाडि तीन रन मात्र थपे । मर्चेन्ट डि ल्याङ्गेको ब्याटबाट अन्त्यतिर १५ रन निस्केको थियो ।

त्यस अगाडि ओपनर विनोद भण्डारीको अर्धशतकको मदद्तले सुदूरपश्चिमले सात विकेट गुमाएर १ सय ५५ रन बनाएको थियो । उनले सर्वाधिक ६३ रन बनाए । उनले ५२ बलमा तीन चौका र दुई छक्का प्रहार गरे । उनको यस सिजन यो दोस्रो अर्धशतक हो । उनलाई छाडेर अरूले गतिलो योगदान गर्न सकेनन् । आफ्नो पहिलो खेल खेलिरहेका अर्का ओपनर पाकिस्तानी ब्याटर मुख्तार अहजमले १० रन मात्र बनाए ।

यस्तै सेल्डन ज्याक्सनले पनि पहिलो खेल खेल्ने क्रममा ११ बलमा २० रन जोडे । इशान पाण्डे भने १३ रन बनाएर हेजलेटको बलमा आउट भए । नरेन भट्टले त्यसमा बाउन्ड्रीमा सनसनीपूर्ण क्याच लिए । दीपेन्द्रसिंह ऐरीले पनि धेरै ठूलो योगदान दिन सकेनन् र उनी तीन रन मात्र बनाएर रनआउट भए । हरमित सिंहले १४ रन मात्रै बनाउन सके । आरिफ सेखले इनिङ्सको अन्त्यति २० रन बनाए । विराटनगरको बलरमध्ये प्रतिश र ल्याङ्गेले दुई दुई विकेट लिए ।