आइतबारदेखि वर्षा रोकिएको र सडकको पहिरो पन्छाइएपछि अहिले काठमाडौँ भित्रिने र बाहिरिने सवारी साधनहरू चलिरहेका छन्। पृथ्वी राजमार्ग, काठमाडौँदेखि हेटौँडा, नुवाकोट र काभ्रेतर्फ जाने सबै सडकहरू अहिले सञ्चालनमा छन्। यातायात सेवा अवरुद्ध हुँदा बाटोमा अलपत्र परेका, घर र आफन्तकहाँ बसिरहेका यात्रुहरू अब आ-आफ्नो कार्यक्षेत्रतर्फ फर्किरहेका छन्। दसैँमा काठमाडौँबाहिर गएकाहरू अहिले धमाधम काठमाडौँ फर्किन थालेका छन्।