लामो इतिहास बोकेको वायुसेवा निगममा अहिले ५२ अर्ब ऋण रहेको र सञ्चित घाटा ४ अर्बबाट बढेर १७ अर्ब पुगेको समाचार आएको छ । नेपाल वायुसेवा निगमका कार्यर्कारी अध्यक्ष युवराज अधिकारीको चार वर्षे कार्यकाल सकिन लाग्दा वायुसेवा निगमलाई ठूलो ऋण भार बोकाएर जाँदै छन् ।

राजनीतिक हस्तक्षेप, आन्तरिक कलह र फितलो व्यवस्थापनका कारण उनको कार्यकालमा निगमले अपेक्षित सफलता पाउन सकेन भन्दा फरक नपर्ला । निगमका कर्मचारीले सिट क्षमता हुँदाहुँदै सिट छैन भनेर यात्रुलाई फर्काउने, कर्मचारीलाई भ्रमणका लागि निःशुल्क टिकट उपलब्ध गराउने, निगम घाटामा जाँदा पनि कर्मचारीले बोनस खानैपर्ने जस्ता अनगिन्ती कारणले गर्दा आज वायुसेवा निगम घाटामा गएको छ ।

वायुसेवा निगम एक समय एसियाकै गौरवमय संस्थाका रूपमा उभिन सफल भएको थियो, आन्तरिक उडानदेखि अन्तर्राष्ट्रिय उडानसम्म निगमको एकाधिकार जस्तो थियो । तर बिस्तारै निगमको गति ओरालो लाग्दै गयो भन्दा फरक पर्दैन । जापान, जर्मन, लन्डनसम्म आफ्नो राष्ट्रिय ध्वजा बोकेर निगमका विमान उड्थे । अहिले आएर सबै रोकिएका छन् । कसका कारणले भन्दा पनि राजनीतिले । जबसम्म देशमा राजनीतिले नीति लिन र गति लिन सक्दैन, यस्तै हो हालत । – पुरुषोत्तम घिमिरे, जोरपाटी, काठमाडौं