काठमाडौँ — विज्ञानको क्षेत्रमा प्रसिद्धि कमाएका महावीर पुन शिक्षामन्त्री बनेपछि देश/विदेशमा बस्ने नेपालीमा नयाँ आशा जागेको छ । लामो समयदेखि चरम राजनीतीकरणको दुश्चक्रमा फसेको शिक्षा क्षेत्र उनकै कार्यकालमा सप्रिनेमा युवा विद्यार्थी मत्रै होइन, आमजनसमुदाय पनि धेरै आशावादी छ । अहिले सहरदेखि गाउँसम्म, विश्वविद्यालयदेखि प्राथमिक विद्यालयसम्म राजनीतिक नङराले नचिथोरेको ठाउँ भेटिँदैन । 

प्रथमतः राजनीतिक भागबन्डाबाट शिक्षण, प्राज्ञिक क्षेत्रमा नियुक्ति पाउने अदक्ष, नेताका आफ्ना मान्छेले संस्थाहरूलाई कुरूप बनाउँदै लगेका हुन् भने विज्ञहरू पाखामा बसेर टुलुटुलु हेर्न बाध्य छन् ।

राजनीतिक आडमा त्रिभुवन विश्वविद्यालय परिसरको जग्गा हडप्ने, संघसंगठनका विद्यार्थीले प्राध्यापक, पदाधिकारीलाई कुट्ने, पुस्तकालयमा आगजनी गर्ने, महिनौंसम्म तालाबन्दी गरेर विद्यार्थीको भविष्यमाथि खेलबाड गर्ने सन्दर्भ होस् या विश्वविद्यालयका प्रशासकले समयमा परीक्षा सञ्चालन नगर्ने, नतिजा प्रकाशन गर्न वर्षौं लगाउनेलगायत विषय नै किन नहुन्, यसबाट लाखौं विद्यार्थी, अभिभावक प्रताडित बनिरहेका छन् । 

उता नेपालमा संस्कृत भाषाको आयाम बढाउन, आचार्य, शास्त्री तहसम्मको पठनपाठन सञ्चालन गर्न, देश/विदेशमा पूर्वीय दर्शनको गरिमा बढाउन स्थापित दाङको संस्कृत विश्वविद्यालय परिसर विभिन्न संघ–संगठनका विद्यार्थी, कर्मचारीको कुस्ती खेल्ने ठाउँ बनेको छ । लामो समयसम्म हुने गरेको तालाबन्दीले अन्य शिक्षण संस्थाको रेकर्ड तोडेको छ ।