दसैंअगाडि सरकारी पक्ष र यातायात व्यवसायी संगठनबीच बैठक बस्ने गर्छ । सो बैठकमा सरकार र यातायात व्यवसायीबीच यात्रीको पीर–मर्कालाई ध्यानमा राखेर सकेसम्म सजिलोसँग गन्तव्यसम्म पुर्‍याउनेजस्ता सहमति भएका हुन्छन् । तर विद्यमान भाडामा यात्रीलाई सहजीकरण गर्नेतर्फ व्यवसायीहरू सकारात्मक देखिन्नन् । 

अग्रिम टिकट बुकिङ गर्न लाइन लाग्न नपर्ने, सहजै टिकट पाउन सकिन्छ भनिन्छ तर सरासर काउन्टरमा जाँदा सिट छैन, मुढामा बस्नुपर्छ आदि टर्रो जवाफ फर्काइन्छ । यसबेला त रुट परमिट खुला हुँदा जस्तासुकै अवस्थाका साधन चलाउने, लामो दूरीमा दुई जना चालक राख्नुपर्ने नियम बनाए पनि कहिल्यै कार्यान्वयन नहुने, भेडाबाख्राझैं खाँदेर यात्रीलाई ओसार्ने, बीच बाटोमा लगेर छोडिदिनेजस्ता यातना सहन बाध्य हुनुपरेको छ । 

अरू बेला त यस्ता थुप्रै दुःख, सास्ती र दोहोरो टिकट महसुल खर्च सहन बाध्य हुनु त नियति बनिसकेको छ । तथापि राष्ट्रिय पर्व दसैं–तिहारका लागि यात्रा गर्नुपर्दा त कम्तीमा सुधारिएको सडकको अवस्था, राम्रो अवस्थाका सवारीसाधन, दुई सय किलोमिटरभन्दा लामा दूरीका बसमा दुई जना चालकको व्यवस्था, सहचालकको राम्रो व्यवहार, एक पटक टिकट लिएपछि यात्रा मिति, गन्तव्य ढुक्क रहन र झन्झट र तनावबिना सजिलैसँग पुग्न पाइयोस् ! तर त्यसको उल्टो यातायात व्यवस्था चालु नभए पनि यात्रीलाई यात्रा गर्न नपाइने चिन्ता र तनाव, चालु भए पनि यात्रीलाई ठग्न, दुर्व्यवहार गर्न नछोड्ने व्यवस्था हटाएर यात्रीको हक र कर्तव्यको पालना हुने व्यवस्था कहिले आउला ? –गंगाराज अर्याल, पाणिनि–८, अर्घाखाँची