काठमाडौँ — भारतको नेपालप्रतिको हेपाहा दृष्टिकोण नौलो होइन । लामो समयदेखि यसले नेपाली सीमामाथि अतिक्रमण गर्दै आइरहेको छ । र, त्यसमा पनि कालापानी क्षेत्रमा उसको विशेष रुचि छ ।

ऐतिहासिक तथ्यहरूले देखाउँछन् कि २०२६ सालमा नेपालबाट भारतले आफ्ना १७ वटा चेकपोस्ट फिर्ता गरेको थियो । तर, उसले त्यतिबेला पनि दार्चुलाको कालापानीस्थित क्याम्प हटाए, जुन आजसम्म यथावत् छ । त्यस कारण लिम्पियाधुरा, लिपुलेक, गुन्जी, नाबी, कुटी लगायतका बस्तीको करिब ३ सय ७० वर्ग किलोमिटर भूभाग भारतद्वारा अतिक्रमणमा परेको छ । 

अब यतिबेला फलाम तातिएको छ । यसलाई चिसो हुन दिनु हुँदैन । तातिरहेका बेला यसलाई मूर्त रूप दिनुपर्छ वा स्वरूप बदल्नुपर्छ । यसका लागि सबै राजनीतिक दल एकढिक्का भएर सार्वभौमिकताको सवालमा अग्रपंक्तिमा उभिनु आवश्यक छ । दलहरूको आन्तरिक प्रतिस्पर्धा वा सत्ता समीकरणभन्दा माथि उठेर यो राष्ट्रिय प्रश्नलाई समाधान गर्नुपर्ने बेला आएको छ ।