काठमाडौँ — पूर्वराष्ट्रपति विद्यादेवी भण्डारीले एमालेमै फर्किएर सक्रिय राजनीतिमा लाग्ने घोषणा गरेदेखि नै प्रधानमन्त्री एवं एमाले अध्यक्ष केपी शर्मा ओलीको भोक निद्रा हराएको छ । ओली आफूलाई मन लागेको कुरा गर्न परे संविधान कानुन केही हेर्दैनन्, अरुले नीति नियमभित्रै रहेर कुनै काम गरे पनि त्यसलाई अनेकथरी अर्थ लगाएर उसैलाई गलत साबित गर्न खोज्छन् ।

आफूले दुई–दुई पटकसम्म संविधनले कल्पना नै नगरेको संसद् विघटन गर्नुलाई उनी बाँचुन्जेल सही गरेको भन्न छोड्नेवाला छैनन् । ओलीले गरेको त्यही असंवैधानिक कामलाई पुनर्विचार गर्नुसम्म नभनी आँखा चिम्लेर स्वीकृति दिने तत्कालीन राष्ट्रपति उनै भण्डारीले यतिबेला आफूले पुनः पुरानै पार्टीमा फर्किएर सक्रिय राजनीति गर्छु भन्दा उनै ओलीसँग सिँगौरी खेल्नु परेको छ । 

ओलीले पार्टीमा फर्कन त के पार्टीतिर पुलुक्क हेर्नसम्म पनि नदिने गरी जुन व्यवहार देखाएका छन्, यसले भण्डारीलाई एमालेको कार्यकर्ता हुँ भन्ने ठाउँ पनि देखिँदैन । अहिलेसम्मको अवस्थालाई हेर्ने हो भने उनी केवले एमाले समर्थक मात्र हुन् भन्ने देखिन्छ । पार्टीको विधान महाधिवेशन नजिकिँदै गर्दा भण्डारीले छुट्टै सम्पर्क कार्यालय खोलेर आˆनो सक्रियतालाई अझै अगाडि बढाउन थालेको र एमालेको पार्टी कार्यालय च्यासलमा भन्दा भण्डारीले स्थापना गरेको सम्पर्क कार्यालयमा नेता–कार्यकर्ताको भीड बढी देख्दा ओलीको होस् उडेजस्तो छ ।