पूर्वराष्ट्रपति विद्यादेवी भण्डारी पुनः नेकपा एमालेमा फर्कन गरेको चहलपहलले त्यस पार्टीमा ठूलै भूकम्प गएको छ । खासगरी पार्टीलाई आफ्नो मुठीमा राखी कब्जा जमाएका अध्यक्ष केपी शर्मा ओलीलाई भण्डारीका त्यस्ता खाले गतिविधि सह्य भएको छैन ।

ओलीले केही दिनअघि एउटा सार्वजनिक कार्यक्रममै भण्डारीलाई ‘फलानो’ को संज्ञा दिँदै पार्टीमा आउने चेष्टा नगरे हुन्छ भन्ने खालको अभिव्यक्ति दिएका थिए । यसअघि निकै घनिष्ठ सम्बन्धमा रहेका ओली र भण्डारीका बीचमा यही कारणले टसल देखिन थालेको छ । भण्डारीको गतिविधि हेर्दा उनी एमालेको एक प्रभावशाली नेतृ नै हुन् भन्न सकिन्छ, त्यसो त केही समय अगाडि चीन भ्रमणमा गएकी उनलाई चीनले एमाले नेताकै रूपमा व्यवहार गरेको थियो ।

एमालेमा ओलीको तानाशाही व्यवहारले बोल्न नपाएका र बोल्न नसकेका नेता/कार्यकर्ता पिल्सिएर बसिरहेका छन् । यसअघि कायम गरिएको उमेर हद ओलीले आफ्नै लागि हटाए, महाधिवेशनको नाम दिए पनि दुई कार्यकाल निर्विरोधजस्तै आफैंले आफैंलाई अध्यक्ष घोषित गरे । अर्को एक कार्यकाल उनी पुनः त्यही प्रक्रिया दोहोर्‍याउने दाउमा लागिपरेका छन् । त्यसैले विद्या भण्डारीको सक्रियता उनलाई कुनै दृष्टिले पनि मन परेको देखिँदैन ।