आसन्न १५औं महाधिवेशनमा सभापतिका एक जना उम्मेदवार शेखर कोइरालाले सोमबार एक समारोहमा कांग्रेसका संस्थापन समूहका नेता तथा कार्यकर्ताहरूले आगामी महाधिवेशन विधानले तोकेको समयभित्र गराऔं भनेर कुरा उठाउनै छोडेको आरोप लगाउनुभएको छ ।
उहाँको त्यो आरोप गगन थापा र विश्वप्रकाश शर्मासमेतलाई लक्षित छ । समयमै महाधिवेशन गराऔं भनेर गगन र विश्वले आवाज उठाउन नसक्नु कस्तो दासताको नमुना हो ?
विधानबमोजिम गर्ने हो भने आसन्न महाधिवेशन २०८२ मंसिरभित्रै गर्नुपर्ने हो । इच्छाशक्ति छ भने यो असम्भव पनि छैन । समयभित्रै महाधिवेशन गरेर अरू पार्टीका लागि आदर्श पेस गर्ने सुवर्ण अवसर पनि कांग्रेससँग छ । तर महाधिवेशन सार्ने परिपञ्च देखिँदा अगुवाले नै बाटो बिराएको जस्तो देखिन्छ । विभिन्न कारण र स्वार्थले पार्टी सभापति शेरबहादुर देउवा समयमै महाधिवेशन गर्न अनिच्छुक भए पनि यदि उनीपछिका दुई उपसभापति र दुई महामन्त्रीले सामूहिक अडान लिने हो भने विधानले तोकेकै समयमा महाधिवेशन हुन सम्भव छ ।
समयभित्र अधिवेशन नहुँदा देउवा मात्र अक्षम हुँदैनन्, उनीपछिका पदाधिकारीहरू पनि अक्षम ठहर्नेछन् । देउवाजी पद भनेपछि हुरुक्कै हुने नेता भएको हुँदा महाधिवेशन एक वर्षपछि धकेल्न खोज्छन् नै । यस कुराको कडा विरोध गगन र विश्वले गर्न सक्नुपर्छ । गगनले एक समारोहमा आफू चार वर्षभन्दा एक दिन पनि बढी महामन्त्रीको कुर्सीमा नबस्ने भनेका थिए । त्यो बोलीको मान उनले राख्छन् कि राख्दैनन् ? हेर्न बाँकी छ । तथापि अरू पार्टीका लागि आदर्श देखाउने कि आफैं चोर बाटोमा हिँड्ने ?
अहिले कांग्रेस पार्टीभित्रको वातावरण निकै तातो भइरहेको छ । त्यसलाई तताउने काम गत शुक्रबार देउवा निवासमा भएको सस्थापन समूहको भेलाले गरेको हो । उक्त भेलाका कारण अब इतरपक्ष पनि तात्ने अवस्थामा पुगेको छ । अहिले सतहमा तीन समूह देखिएको छ । संस्थापन समूहको नेतृत्व स्वयं शेरबहादुर देउवाले गरिरहेका छन् । इतरसमूहको नेतृत्वमा शेखर कोइराला र गगन थापाको बेग्लै समूह छ । १४औ महाधिवेशनमा गगन खुलेरै शेखर समूहमा लागेका थिए तर अहिले उनी कुन समूहमा छन् ? भन्ने खुलेको छैन । देउवा समूहमा शेखर र गगन जत्तिको हेभिवेट उम्मेदवार र अनुहार खासै छैनन् । तथापि यदि शेखर गगनबीच सहमति भएन र दुवै जना सभापति पदमै लडेमा संस्थापन समूहको कमजोर उम्मेदवारले पनि बाजी मार्न बेर लाउँदैन । उनीहरू दुई जना मिलेमा संस्थापन पक्षलाई फलामको चिउरा चपाएसरह नै हुनेछ ।
इतरसमूहमा एक जनालाई पार्टी सभापति र अर्कोलाई प्रधानमन्त्री पद भनेर सहमति गर्न सके १५ औ महाधिवेशन इतरसमूहको पक्षमा सहजै जान सक्छ । अन्यथा फेरि पनि संस्थापन समूह नै आउन सक्छ । तर संस्थापन समूहमा पार्टी सभापति पदमा उठ्ने दर्जनौं अनुहार भएको हुँदा सबैलाई मिलाउन कठिन छ । देउवापछिको त्यस्तो सर्वमान्य अनुहार पनि संस्थापन समूहमा छैन । १४औं महाधिवेशनमा देउवालाई त पहिलो चरणसम्म नछोडेका विमलेन्द्र निधि र प्रकाशमान सिंहले देउवापछिका अनुहारलाई ताली बजाएर स्वागत गर्लान् भनेर अनुमान गर्नु मूर्खता हुन्छ । त्यसमाथि शंशाक कोइराला, पूर्णबहादुर खड्का, कृष्णप्रसाद सिटौलाहरू अब आफ्नै पालि हो भनेर अड्डी कसिरहेका छन् । जति मिलाए पनि संस्थापन समूहभित्रै तीन नयाँ समूह जन्मने सम्भावना छ । तर इतरसमूहमा धेरै अनुहार नहुँदा मिलाउन सहज छ । शेखरले गगनलाई मिलाउन सके राम्रै हुनेछ ।
– गोपाल देवकोटा, गोकर्णेश्वर–८, काठमाडौं
