समस्या समाधान गर्न नसकेपछि टाँस्सिएर बस्ने होइन, पद छोडेर अरूलाई समाधानको जिम्मा दिनुपर्छ भन्ने उच्चतम नैतिक शिक्षा निवर्तमान शिक्षामन्त्री विद्या भट्टराईले देखाएकी छन् ।
उनको यो नैतिकताको पाठ अरूलाई भन्दा पनि स्वयं उनको पार्टीका अध्यक्ष एवं प्रधानमन्त्री केपी शर्मा ओलीका लागि ठूलो चुनौती बनेर खडा भएको छ । किनकि, २१ दिनदेखि चलिरहेको शिक्षक आन्दोलन मत्थर गर्न प्रधानमन्त्री असफल मात्र भएका होइनन्, उल्टै बेतुकका तर्क गरेर शिक्षक आन्दोलनमा नुनचुक लगाउने काम गर्दै आएका छन् ।
अहिले सडकमा शिक्षक मात्र आन्दोलनरत छैनन्, डाक्टरहरू २ महिनादेखि सडकमै छन्, सहकारीपीडितको आन्दोलन, स्थानीय निकायका कर्मचारीको आन्दोलनका साथसाथै राजनीतिक उद्देश्यप्रेरित आन्दोलनहरू पनि सडकमै चलिरहेका छन् । यस्ता कुनै पनि आन्दोलनलाई सम्बोधन गर्न प्रधानमन्त्री असफल भएका छन् । तर पनि उनी पद छोड्ने नैतिकता देखाउन सकिरहेका छैनन् ।
शिक्षामन्त्रीले राजीनामा दिनुपर्ने कारण र पृष्ठभूमि धेरै छन् । उनले शिक्षक समस्या समाधानका लागि ७ बुँदे प्रस्ताव गरेको र उक्त प्रस्तावलाई प्रधानमन्त्रीले मन्त्रिपरिषद् लैजान नदिएपछि उनले राजीनामाको बाटो रोजेको पनि बताइएको छ । जेहोस्, शिक्षामन्त्रीले उच्च नैतिकता प्रदर्शन गरेकी छन्, उनको यो निर्णय पछिसम्म पनि अवश्य सम्झिइरहनेछ ।
– गोपाल देवकोटा, गोकर्णेश्वर–८, काठमाडौं
