प्रधानमन्त्री केपी शर्मा ओली नेतृत्वको गठबन्धन सरकारले नेपाल विद्युत् प्राधिकरणका कार्यकारी निर्देशक कुलमान घिसिङलाई पदबाट बर्खास्त गरेदेखि सामाजिक सञ्जाललगायत संसद् तथा सडक सबैतिर सरकारको विरोध सुरु भएको छ ।
प्रमुख प्रतिपक्षी माओवादी केन्द्रलगायतका दलले प्रधानमन्त्रीले कुलमानलाई बर्खास्त गर्नुपर्नाको चित्तबुझ्दो जवाफ खोजिरहेका छन् । तर प्रधानमन्त्री भने गैरजिम्मेवार जवाफ दिँदै पन्छिरहेका छन् ।
गठबन्धन सरकारको प्रधानमन्त्री जो कतिबेला आफैँ प्रधानमन्त्रीको कुर्सीबाट हुत्याइने हो, कुनै निश्चित छैन । एकातिर राजावादीको बढ्दो चहलपहलले सरकारलाई झस्काइरहेको छ भने सहयात्री गणन्त्रवादीलाई नै चिढ्याउने गरी सरकारले पछिल्ला जुन गतिविधि गरिरहेको छ, यसले सरकार अझै कमजोर अवस्थामा पुगेको सहजै अनुमान गर्न सकिन्छ ।
वर्तमान सत्ता गठबन्धनको मुख्य दल कांग्रेसका सभापति तथा ‘पर्खाइका प्रधानमन्त्री’ का रूपमा रहेका शेरबहादुर देउवाले प्रधानमन्त्री ओलीलाई कांग्रेसको पूर्ण समर्थन रहेको भनेर उक्साइरहेका छन् । ओली त्यही आडमा उम्लिएर प्रतिपक्षीलाई चिढ्याउने अभिव्यक्ति दिइरहेका छन् । यसले वर्तमान सत्ता गठबन्धनकै आयु घटाइरहेको कुरा प्रधानमन्त्री ओलीले बेलैमा बुझ्नु जरुरी छ ।
अहिले सडकमा देखिएको भीड सांकेतिक रूपमा मात्रै आएको हो र ओलीले यसैगरी प्रतिपक्षी र सर्वसाधारण जनतालाई रुष्ट पार्ने गरी एकपछि अर्को अभिव्यक्ति दिँदै गए भने कुलमानको पुनःस्थापना मात्रै होइन, ओली सरकार नै तलमाथि पर्न बेर छैन । यसर्थ देउवाको टेको समाएर ओलीले आफ्नै धरातल बिर्सिएर ठूला कुरा नगरेको राम्रो होला । अन्यथा उनको ‘सरकारले एउटा हटायो, अर्को नियुक्त गर्यो, सिद्धियो, कहाँ पार्लियामेन्टमा जवाफ दिने ?’ भन्ने जवाफ नै सत्ता लडाउने अस्त्र बन्न बेर लाग्ने छैन ।
- सुजन देवकोटा, पालुङ्टार–४, गोरखा
