जुन जोगी आए पनि कानै चिरेको भनेझैं जनतालाई जुन व्यवस्था आउँदा पनि तात्त्विक रूपमा केही फरक परेको छैन ।
गरिखाने वर्गको अवस्था त झन्झन् खस्किँदै गइरहेको छ । संसारमै राम्रो व्यवस्था भनेर प्रशंसा हुने लोकतन्त्र नेपालमा आएको पनि १७ वर्ष बितिसकेको छ ।
आखिर यो व्यवस्थाबाट जनताले के पाए त भन्ने प्रश्न उब्जिएको छ । नेताहरूको अकर्मण्यताकै कारण जनतामा नैराश्य छाएको हो । नेता आफ्नो कर्तव्यभन्दा सत्ताकेन्द्रित राजनीतिमा रुमल्लिएकै कारण जनता व्यवस्थाकै विकल्प खोज्न सडकमा उत्रिन बाध्य भएका हुन् ।
व्यवस्था परिवर्तन भयो, तर जनताको अवस्थामा परिवर्तन आएन । हिजोभन्दा आज झन् विकराल अवस्था छ । जनताको दैनिकी झन् कष्टकर बन्दै छ । महँगीले आकाश छुन खोजेको छ । बिचौलियाको रजगज छ । भ्रष्टाचारको त कुरै नगरौं । यो त बढेको बढै छ ।
- पुरुषोत्तम घिमिरे, जोरपाटी काठमाडौं
