ट्रान्सपरेन्सीको २०२३ को प्रतिवेदनमा नेपाल फेरि अति भ्रष्टाचार हुने देशको सूचीमा परेको खबर प्रधानमन्त्रीले पाउनुभएको होला कि अध्यादेशको पछि लाग्दा खबर छुटेको होला ?

प्रधानमन्त्रीज्यू, देशको रिमोर्ट कन्ट्रोल तपाईंको हातमा छ । सार्वजनिक निकायका सबै संयन्त्र तपाईंका निर्देशनमा चल्छन् । सम्झिरहेछु, ‘समृद्ध नेपाल ः सुखी नेपाली’ तपाईंले सिर्जना गरेको नारा हो । यही नारालाई तन्काएर धेरै ठाउँमा धेरै भाषण गर्नुभयो होला, ताली खानुभयो होला ।

आज अखबारको पहिलो पृष्ठमा तपाईंकै कार्यकालमा देश अति भ्रष्टाचारको सूचीमा परेको मात्र होइन, ‘ग्रे लिस्ट’ मै पर्ने जोखिममा देखिनुले तपाईंको शासनको नारालाई धज्जी उडाएको होइन र ? के तपाईंलाई यस्तो अवस्थामा आफूले देशलाई राम्रै तरिकाले चलाइराखेको जस्तो लाग्छ ? देशको यो अवस्था छ, तपाईं अध्यादेशको पछि लागिरहनुभएको छ, जनतालाई सरकार ढल्दैन भनेर स्पष्टीकरण दिँदै हिँड्नुभएको छ । संसद् चलेको दिनको उपलब्धि हेर्ने हो भने दलगत आरोप–प्रत्यारोपबाहेक केही हुँदैन । यसरी पनि देश समृद्ध हुन्छ ? तपाईं सामाजिक सञ्जाललाई नियमन गरेर देशमा समृद्धि ल्याउने कस्तो उपाय देख्नुभयो ? भूमि अध्यादेश ल्याएर कस्तो समृद्धि ल्याउन खोज्नुभएको हो ?

प्रधामन्त्रीज्यू, हामीले भाषण धेरै सुनिसक्यौं । तपाईंको मात्र होइन, सबै दलका सबै नेताका भाषण सुन्यौं । चुनावी घोषणापत्र पढ्यौं । अब देशलाई कुनै भाषणको जरुरत छैन । भाषणमा समय र ऊर्जा खर्च गर्नुभन्दा सुशासनका लागि तपाईंले गर्नैपर्ने काम के हो, त्यसमा अलि गम्भीर भएर काम गरे देशको अवस्था अलिकति बदलिन्थ्यो कि । यदि तपाईं भाषणमा मात्र नभई व्यवहारमै सुशासन चाहने मान्छे हुनुहुन्छ भने, तपाईंको र अन्य मन्त्रीहरूको सम्पत्ति विवरण बुझाउन पनि किन हिम्मत नगरेको ? आफ्नै सम्पत्ति विवरण नदेखाउने प्रधानमन्त्रीले ‘म आफू पनि भ्रष्टाचार गर्दिनँ अरूलाई पनि भ्रष्टाचार गर्न दिन्नँ’ भन्ने कुरालाई हामीले कसरी पत्याउने ?
– कृष्णप्रसाद शर्मा, दाङ, हालः काठमाडौं