२०७१ मा सिद्धार्थनगर (भैरहवा) स्थित गौतम बुद्ध विमानस्थललाई क्षेत्रीय अन्तर्राष्ट्रियस्तरमा स्तरोन्नति गर्न शिलान्यास गरिएको थियो । त्यसको लक्ष्य थियो– शाक्यमुनि बुद्धको जन्मस्थल लुम्बिनीको पर्यटकीय विकास र प्रवर्द्धनमार्फत राष्ट्रको अर्थतन्त्र बलियो बनाउने । सरकारको यो कदमपछि लुम्बिनी क्षेत्रका मात्रै होइन, मुलुकभरिकै उद्यमी उत्साहित भए । 

भैरहवा–लुम्बिनी क्षेत्रमा खासगरी होटल तथा आतिथ्यता एवं पर्यटनमा लगानी वृद्धि भयो । होटल एसोसिएसन अफ नेपाल (हान) लुम्बिनी प्रदेश समितिको तथ्यांकअनुसार भैरहवा–लुम्बिनी क्षेत्रमा मात्रै अहिले ४ पाँचतारे होटल, ९ चारतारे होटल र १ तीनतारे होटल सञ्चालनमा छन् । गौतम बुद्ध विमानस्थल सञ्चालनमा आएपछि पर्यटन उद्योग फस्टाउने अपेक्षाका साथ विमानस्थललाई लक्षित गरी यी होटल खुलेका हुन् । होटल व्यवसायमा मात्र भैरहवा–लुम्बिनी क्षेत्रमा एक खर्ब रुपैयाँभन्दा बढी लगानी भइसकेको छ । यो विमानस्थल बन्ने भएपछि ठूला तारे होटल मात्रै होइन, मझौला तथा साना होटल, रेस्टुरेन्ट पनि थपिए ।

यो विमानस्थललाई लक्षित गरी रूपन्देही अतिरिक्त बर्दिया र बाँके जिल्लामा पनि होटल व्यवसायमा ठूलो परिमाणमा रकम लगानी भएको छ । भैरहवा र नेपालगन्जमा पनि होटल व्यवसायमा ठूलो रकम लगानी भएको छ । लुम्बिनी प्रदेश क्षेत्रमा मात्रै साना–ठूला गरी २ हजारभन्दा बढी संख्यामा होटल तथा रेस्टुरेन्ट सञ्चालनमा छन् । यी सबैको लगानी जोड्ने हो भने खर्बौं रुपैयाँ भइसकेको छ । २ जेठ २०७९ मा विमानस्थलको उद्घाटन भएपछि उद्योगी–व्यवसायीमा हर्षको सीमा रहेन । नयाँले लगानी गर्न र पुरानाले लगानी थप्न हौसिए । हामीले देख्दादेख्दै भैरहवा–लुम्बिनी क्षेत्र पर्यटकीय पूर्वाधारले भरियो । र, पर्यटकीय पूर्वाधारको नगरी बन्यो भैरहवा–लुम्बिनी क्षेत्र । तर, उद्घाटन भएको ४ वर्ष बितिसक्दासम्म विमानस्थल पूर्ण क्षमतामा सञ्चालनमा नआएपछि अहिले यस क्षेत्रका उद्योगी–व्यवसायीहरू निराश र दुःखी छन् ।

यो विमानस्थललाई लक्षित गरी रूपन्देही अतिरिक्त बर्दिया र बाँके जिल्लामा पनि होटल व्यवसायमा ठूलो परिमाणमा रकम लगानी भएको छ । भैरहवा र नेपालगन्जमा पनि होटल व्यवसायमा ठूलो रकम लगानी भएको छ । सोसाइटी अफ ट्राभल एन्ड टुर अप्रेटर्स नेपाल (सोट्टो नेपाल) को लुम्बिनी प्रदेश समितिको तथ्यांकअनुसार, ट्राभल टुर क्षेत्रमा पनि झन्डै एक खर्ब रुपैयाँ लगानी भएको छ । लुम्बिनी प्रदेश क्षेत्रमा २ सय बढी यस्ता संस्था सञ्चालित छन् । सरकारको पनि पूर्वाधार क्षेत्रमा खर्बौं रुपैयाँ लगानी भइसकेको छ । 

विमानस्थल पूर्ण क्षमतामा सञ्चालनमा नआएपछि यो लगानी अहिले जोखिममा छ । उद्योगी व्यवसायीले यो विमानस्थल सञ्चालनका लागि सरकारसँग धेरै पटक माग राखे । दबाबमूलक कार्यक्रमहरू पनि सञ्चालन गरे तर विमानस्थल पूर्ण क्षमतामा सञ्चालनमा आउन सकेको छैन ।

नवगठित दुईतिहाइ बहुमतको सरकारसँग आफूहरूले ठूलो अपेक्षा राखेको यस क्षेत्रका व्यवसायीको भनाइ छ । 

अब यो सञ्चालनका लागि नयाँ सरकारले पहल गरोस् र समस्या समाधानको उपाय खोजोस् भन्ने चाहना व्यवसायीको छ । भारतका पर्यटकीय सहरहरूमा आवतजावतका लागि हवाई र रेलमार्गको सुविधा मिलाउनसमेत सरकारले यथाशीघ्र पहल गर्नुपर्छ । व्यवसायीहरूले माग गरेजस्तै श्रम, राहदानी, स्वास्थ्य परीक्षण र प्रवेशाज्ञाको सुविधा भैरहवाबाटै दिने व्यवस्था मिलाउन ठूलो कठिनाइ नहोला । 

नेपाल उद्योग वाणिज्य महासंघ लुम्बिनी प्रदेश समितिका अध्यक्ष ठाकुरप्रसाद श्रेष्ठको भनाइमा यो विमानस्थल पूर्ण क्षमतामा सञ्चालन नहुँदा व्यवसायी र सरकारको खर्बौं रुपैयाँ लगानी जोखिममा परेको छ । अतः सरकारले यसको सञ्चालनका लागि भारत सरकारसँग कूटनीतिक पहल गर्नुपर्छ । भैरहवादेखि भारतको दिल्ली उडानको व्यवस्था मिलाउनेबित्तिकै समस्या समाधानको वातावरण सिर्जना हुन्छ । यात्रुको समस्या छैन । गौतम बुद्ध विमानस्थल सञ्चालनको माग लुम्बिनी प्रदेश क्षेत्रको माग मात्रै होइन, नेपाल राष्ट्रकै माग हो । यो क्षेत्र राष्ट्रिय अर्थतन्त्रकै आधारस्तम्भ बन्न सक्छ । यो विमानस्थल पूर्ण क्षमतामा सञ्चालनमा आउने हो भने लुम्बिनी प्रदेश क्षेत्रको पर्यटन उद्योगमा कायापलट हुनेछ । यसकारण यो विमानस्थल सञ्चालनको माग भैरहवा एवं रूपन्देहीवासीको मात्र नभई समग्र लुम्बिनी प्रदेशवासी र राष्ट्रकै हो । यो विमानस्थल लुम्बिनी प्रदेश र गण्डकी प्रदेशवासीको भाग्यरेखा हो ।