दाङ — गत शनिबार बबई गाउँपालिका–७ जलजलामा सयौँ स्थानीयहरू भेला भएका थिए । उनीहरू कुनै दलको कार्यक्रममा भेला भएका थिएनन्, न कुनै सभा–समारोहकै लागि उनीहरू जम्मा भएका थिए । बरु उनीहरू त आउने चुनावमा भोट माग्न आउने उम्मेदवारहरूलाई आफूहरूले सामूहिक रूपमा के प्रश्न गर्ने भन्ने विषयमा सहमति जुटाउन भेला भएका थिए । यही भेलामा उनीहरूले वर्षौँदेखि आफ्ना कुरा नसुन्ने अनि आश्वासन मात्रै दिने तर चुनावपछि फर्केर नआउने दलहरूलाई किन भोट दिने भनेर पनि छलफल भयो । छलफलबाट उनीहरू उस्तै परे यो निर्वाचनमा भोट नै नहाल्ने निष्कर्षमा पुगे ।

दाङको बबई गाउँपालिकाका वडा नम्बर १ र ७ तथा दंगीशरण गाउँपालिकाको १ मा जंगली जनावरको प्रत्यक्ष प्रभाव खेप्ने २ हजार मतदाता छन् । तीमध्ये धेरैजसो मतदाताहरू त्यहाँ भेला भएका थिए । पछिल्ला दुई आर्थिक वर्षमा मात्रै ४ सय ५७ घरधुरीको पशु र अन्नबाली वन्यजन्तुले नोक्सान गरेको छ । पीडितको दाबीअनुसार त्यसबाट झन्डै ४५ लाख रुपैयाँको नोक्सानी भएको छ । लगाएको बालीनालीदेखि गोठमा बाँधेका गाईवस्तुसमेत जंगली जनावरले खाइदिनाले यहाँका नागरिकहरू पीडित बनेका छन् । पटक–पटक माग राखे पनि कतैबाट सुनुवाइ नभएपछि उनीहरूले फागुन २१ को निर्वाचन बहिष्कार गर्नेसम्मको चेतावनी दिए ।

स्थानीय चन्द्रबहादुर राङुमगरले बस्ती स्थानान्तरणको मुद्दा नसुल्झाउने हो भने सबै गाउँलेहरूले मतदान नगर्ने निष्कर्षमा पुगेको सुनाए । बबई गाउँपालिका–७ का चिन्ताबहादुर बुढाले पनि चन्द्रकै जस्तो कुरा सुनाए । उनले भने, ‘बाटो र बिजुलीको आश्वासनबाट हामी पीडित छौँ । त्यसैले हामीहरू मतदान नै नदिने भनेर बसेका छौँ ।’

बबई गाउँपालिका–७ जलजलाका ठाकुर प्रसाद वलीका चारवटा गोरू दुई महिनाको फरकमा बाघले खायो । खेतवारी जोत्ने ट्र्याक्टर नपाइने, र हलगोरू बाघले खाइदिएपछि ठाकुरलाई अहिले के गरी बाँच्ने चिन्ता थपिएको छ । उनले प्रश्न गरे, ‘के खाने, के गर्ने ? कसरी बाँच्ने ?’

बबई–७ मलैखोलाका दिलबहादुर परियारको व्यथा पनि ठाकुरको भन्दा फरक छैन । किनकि गत मंसिरमा उनको गोठमै बाँधेको दुई गोरू र दुई सुँगुर बाघले खाइदियो ।