काठमाडौँ — भारतीय प्रधानमन्त्री नरेन्द्र मोदीको नेपाल भ्रमणको औपचारिक घोषणा भएको छ । कूटनीतिक परम्पराअनुसार दुवै मुलुकका परराष्ट्र मन्त्रालयले शुक्रबार एकै समयमा विज्ञप्ति जारी गर्दै आगामी शुक्रबार र शनिबार मोदीले नेपालको राजकीय भ्रमण गर्ने जनाएका हुन् ।

परराष्ट्र मन्त्रालय र भारतीय विदेश मन्त्रालयले जारी गरेको विज्ञप्तिमा भनिएको छ, ‘प्रधानमन्त्री केपी ओलीको निमन्त्रणामा भारतीय प्रधानमन्त्री मोदी आगामी २८ गते नेपालको राजकीय भ्रमण आउनेछन् । भ्रमण क्रममा उनी ऐतिहासिक धार्मिक सहर जनकपुर र मुक्तिनाथ जाने कार्यक्रम छ ।’ भारतीय विदेश मन्त्रालयले जारी गरेको विज्ञप्तिमा मोदीले राजनीतिक दलका नेताहरूसँग पनि छलफल गर्ने उल्लेख भए पनि नेपालतर्फको विज्ञप्तिमा त्यो विषय उल्लेख छैन । प्रधानमन्त्री मोदीलाई काठमाडौं महानगरपालिका र जनकपुर उपमहानगरपालिकामा नागरिक अभिनन्दन गर्ने कार्यक्रम छ । प्रधानमन्त्री केपी ओलीले शुक्रबार नै भारतीय समकक्षीसँग वार्ता गर्ने कार्यक्रम तय भएको छ ।

उनलाई टुँडिखेलमा गार्ड अफ अनर दिने कार्यक्रम छ । भारतले यो भ्रमणलाई द्विपक्षीय नियमित उच्चस्तरको भ्रमणको शृंखला भनेको छ । विज्ञप्तिमा दुवै प्रधानमन्त्रीले अरुण तेस्रो जलविद्युत् परियोजना शिलान्यास संयुक्त रूपमा गर्ने जनाइएको छ । तर, शिलान्यास त्यहीँ पुगेर हुने या संयुक्त पत्रकार सम्मेलन क्रममा स्विच थिचेर गर्ने खुलाइएको छैन ।

दुई प्रधानमन्त्रीबीच नेपाल–भारत सम्बन्धमा रहेका समस्या निराकरणका लागि समेत पहल गर्ने जनाइएको छ । प्रधानमन्त्री ओलीले आफ्नो भारत भ्रमण क्रममा दुई देशको सम्बन्धमा समस्याको चाङ रहेको बताएपछि भारतीय पक्षले त्यसको स्पष्ट खाका मागेको थियो । परराष्ट्र मन्त्रालय अहिले त्यही खाका तय गर्न जुटेको छ । यद्यपि कतिपय समस्या समाधानको खाका प्रबुद्ध व्यक्ति समूह (ईपीजी) मा नै छलफल भइरहेको छ ।