काठमाडौँ — भक्तपुरको चाँगुनारायण नारायण नगरपालिकास्थित सुडालमा ट्र्याक्टर दुर्घटना हुँदा दुईजनाको मृत्यु भएको छ । ९ जना घाइते भएका छन् । 

ढलान गर्न प्रयोग हुने मिक्स्चर बोकेको ट्र्याक्टर दुर्घटनामा २२ वर्षीय हेमबहादुर नेपाली र ३२ वर्षीय विजय राईको मृत्यु भएको जिल्ला प्रहरी परिसर भक्तपुरका प्रमुख एसपी सुर्यबहादुर खड्काले जानकारी दिए । 

कलमसीबाट कमलविनायक आउँदै गरेको ट्र्याक्टर दुर्घटना भएको प्रहरीले जनाएको छ । घाइतेहरूको भक्तपुर अस्पतालमा उपचार भइरहेको छ ।