काठमाडौं — जेन–जी आन्दोलनसँग सम्बन्धित घटनामा पक्राउ परेका विनोद कार्की, अनुपम भण्डारी र युनिक श्रेष्ठका परिवारलाई धरौटीमा छुटाइदिने अश्वासन दिँदै रकम असुलेको आरोपमा काठमाडौंको बुढानिलकण्ठका ४५ वर्षीय हरिबहादुर थापा मगरविरुद्ध ठगी मुद्दा दर्ता गरिएको छ ।

प्रहरीको जाहेरीअनुसार मगरले सपना प्रधान मल्ल आफ्नो दिदि भएको दाबी गर्दै सर्वोच्च अदालतमा रिट दर्ता गराई भनसुनमार्फत धरौटीमा छुटाइदिने आश्वासन दिएका थिए । उनले धरौटी रकम तथा वकिलको बहस खर्चका नाममा ९ लाख ३६ हजार ५ सय रुपैयाँ लिएको आरोप लगाइएको छ ।

सोही आधारमा प्रहरीले विश्वासमा पारेर ठगी गरेको अभियोगमा १६ चैतमा मुद्दा दर्ता गरी अनुसन्धान अघि बढाएको जनाएको छ । जाहेरीवाला छत्रबहादुर कार्की, देवा भण्डारी, नारायणबहादुर श्रेष्ठले छोरा छुटाईदिन्छु भनेर ठगी गरेको भन्दै सामुहिक रुपमा मुद्दा दर्ता गराएका थिए । कारागार कार्यालय काठमाडौं सुन्धारामा पुर्पक्षको लागि थुनामा रहेका छोरा भेट्न आउँदा मगरसँग भेट भएको उनीहरूले जाहेरीमा बताएका छन् । 

००००

सामान्यतः प्रहरी देख्दा अपराधमा संलग्न व्यक्तिहरू डराउने अपेक्षा गरिन्छ । तर, पछिल्ला दिन प्रहरी कार्यालय आसपासमै बिचौलियाको सक्रियता देखिन थालेपछि जिल्ला प्रहरी परिसर काठमाडौंले त्यस्ता गतिविधि नियन्त्रण गर्न कडाइ थालेको छ ।

परिसरको कार्यालय भवनमा प्रवेश गर्नेबित्तिकै ‘सेवाग्राहीलाई स्वागत, बिचौलियालाई निषेध’ भन्ने सन्देश देख्न सकिन्छ । यस्ता सूचनाहरू प्रवेशद्वारमा मात्र होइन, अनुसन्धान कक्षसहित कार्यालयभित्रका विभिन्न स्थानमा पनि राखिएका छन् ।