उनका अनुसार कारबाहीमा परेका अधिकांश चालकले ‘अनलाइन प्लेटफर्म’को अनुमतिबिना अफलाइन रूपमा सेवा सञ्चालन गरिरहेका थिए । यसैगरी, जथाभावी स्थानमा यात्रु चढाउने र झार्ने (पिक एन्ड ड्रप) कार्य, सवारीसाधनको प्राविधिक अवस्था कमजोर हुनु, आवश्यक कागजात नहुनु तथा ट्राफिक नियमको उल्लङ्घन गर्ने गतिविधि पनि भेटिएको प्रवक्ता सुवेदीले जानकारी दिए ।

'राइड सेयरिङ सेवाका लागि सम्बन्धित निकायबाट अनुमति लिनुपर्छ, सवारीसाधनको नियमित मर्मतसम्भार, चालकले आवश्यक कागजात बोकेको हुनुपर्छ,' उपत्यका ट्राफिक प्रहरी कार्यालयका प्रमुख एवं प्रहरी वरिष्ठ उपरीक्षक नवराज अधिकारीले भने, 'तोकिएका नियमको पालना गर्नु अनिवार्य हुन्छ । यी आधारभूत मापदण्डको बेवास्ता गर्नेमाथि कारबाही प्रक्रिया अघि बढाइएको हो ।' 

विशेषगरी व्यस्त चोक, अस्पताल क्षेत्र, विद्यालय आसपास तथा मुख्य सडकमा जथाभावी रोकिएर यात्रु ओसारपसार गर्दा यातायात अवरोध हुनाका साथै दुर्घटनाको जोखिम पनि बढ्ने भएकाले यसप्रति कडाइ गरिएको ट्राफिक प्रहरी प्रमुख अधिकारीको भनाइ छ ।