काठमाडौँ — नेपाल पत्रकार महासंघले नेपाल रिपब्लिक मिडिया लिमिटेडको प्रकाशन नागरिक दैनिकमा कार्यरत श्रमजीवी पत्रकारले तोकिएको सेवासुविधा नपाएकोप्रति चिन्ता व्यक्त गर्दै तलब सुनिश्चित गर्न माग गरेको छ ।

महासंघका वरिष्ठ उपाध्यक्ष दीपक आचार्य नेतृत्वको टोलीले बुधबार नागरिक दैनिकका प्रबन्ध निर्देशक तथा प्रमुख कार्यकारी अधिकृतको कार्यकक्षमा तालाबन्दी गर्दै पत्रकारले पाउनुपर्ने सेवासुविधा तत्काल उपलब्ध गराउन व्यवस्थापनसँग आग्रह गरेको थियो । तालाबन्दीको केही घण्टापछि नेपाल प्रहरी, स्थानीय तह र सम्बन्धित पक्षको उपस्थितिमा ताला खोल्दै व्यवस्थापनसँग संवाद सुरु गरिएको महासंघले जनाएको छ ।

महासंघका महासचिव रामप्रसाद दाहालका अनुसार गत साउन २२ गते महासंघ र नेपाल रिपब्लिक मिडिया लिमिटेडबीच भएको सम्झौता कार्यान्वयन नभएकाले पूर्वसूचना दिएर तालाबन्दी गर्नुपरेको हो । नेपाल पत्रकार महासंघ नागरिक प्रतिष्ठान शाखाका अध्यक्ष रघुनाथ लामिछानेले लामो समयदेखि तोकिएको सेवासुविधा नपाएपछि पत्रकारहरू आन्दोलनमा उत्रन बाध्य भएको बताए । उनले भने, ‘सरकारले तोकेको न्यूनतम पारिश्रमिक नदिएको र कोभिड–१९ को बहानामा करिब ४३ महिनासम्म ५० देखि ७५ प्रतिशतसम्म तलब कटौती गरिएको छ ।’