काठमाडौँ — क्रियाशील पत्रकार महिला (डब्लुडब्लुजे) ले महिला पत्रकारको क्षमता अभिवृद्धिको उद्देश्यसहित काठमाडौंमा तीन दिने तालिम सम्पन्न गरेको छ । 

यूएनडीपीको पीएसपी परियोजनाको सहयोगमा सम्पन्न पत्रकार महिलाका लागि संसदीय मामिलामा खोजमूलक रिपोर्टिङ शीर्षकको तालिममा विभिन्न सञ्चारमाध्यममा कार्यरत २५ जना पत्रकार महिला सहभागी थिए । तालिमको पहिलो दिन त्रिभुवन विश्वविद्यालयका लेक्चरर जगत नेपालले संसद्‍को संरचना, कार्य र प्रक्रियाहरुका बारेमा प्रशिक्षण दिएका थिए  । 

त्यसैगरी अर्का प्रशिक्षक अन्नपूर्ण पोष्टका समाचार सम्पादक नरेन्द्र साउदले संसदीय रिपोर्टिङ र यसका अभ्यासहरु विषयमा प्रस्तुति दिएका थिए । 

दोस्रो दिन पूर्वसञ्चार तथा सूचना प्रविधिमन्त्री रेखा शर्माले संसद्‍मा लैंगिक मुद्दा र सञ्चार सम्बन्ध विषयक आफ्नो अनुभव सुनाएकी थिइन् । दोस्रो सत्रमा संघीय संसदअन्तर्गतको राष्ट्रिय सभाका पूर्वसचिव राजेन्द्र फुँयालले संसद् सचिवालय र यसका मुख्य जिम्मेवारीका विषयमा पत्रकार महिलालाई जानकारी दिएका थिए ।

तालिमको तेस्रो दिन नेपाल पत्रकार महासंघका पूर्वअध्यक्ष शिव गाउँलेले खोज पत्रकारिताको नैतिक मापदण्डका विषयमा प्रशिक्षण दिएका थिए भने दोस्रो सत्रमा खोज पत्रकारिता केन्द्रकी पूर्वअध्यक्ष नम्रता शर्माले संसदीय रिपोर्टिङमा खोज पत्रकारिता विषयमा प्रस्तुति दिएकी थिइन् ।