काठमाडौँ — काठमाडौं उपत्यकाका विभिन्न स्थानमा गरिएको विशेष चेकजाँचका क्रममा सवारी जाँचपास नभएका र अत्यधिक धुँवा फाल्ने ३७ सवारी साधन ट्राफिक प्रहरीले नियन्त्रणमा लिएको छ ।

काठमाडौं उपत्यका ट्राफिक प्रहरी कार्यालयका प्रवक्ता प्रहरी उपरीक्षक नरेशराज सुवेदीका अनुसार सोमबार चेकिङका क्रममा १६ वटा भाडाका बस, १४ वटा पिकअप भ्यान, ४ वटा स्कुल बस, २ वटा निजी कार र १ वटा भाडाको कार गरी ३७ सवारी साधन नियन्त्रणमा लिइएको हो । 

सुवेदीका अनुसार ती सवारी साधनलाई सवारी तथा यातायात व्यवस्था ऐन, २०४९ बमोजिम अवस्था ठीक नभएको सवारी साधन चलाएको अभियोगमा कारबाही प्रक्रिया अघि बढाइने छ । 

उक्त ऐनको दफा २३ मा सवारी साधनबाट हुन सक्ने प्रदूषणको परीक्षण गर्नुपर्ने व्यवस्था अनुसार सो परीक्षण नगरेमा सम्बन्धित निकायले सवारी दर्ता रोक्का गर्ने निर्देशनसमेत  कानुनी प्रावधान  छ ।