पवित्रनगरबाट घरको प्यासेजमा रहेको १५ हजार रुपैयाँ पर्ने गियर भएको बच्चाले चलाउने साइकल चोरी गरेर युवकले कबाड किनबेच गर्ने व्यक्तिलाई दुई हजारमा बेचेपछि यो रहस्य खुलेको हो ।
What you should know
काठमाडौँ — चोरी तथा आपराधिक उपद्रव मुद्दामा कारागारबाट छुटेका आशिष क्षेत्रीले आफूसँग खानलाई पैसा नभएपछि चोरी गर्ने र त्यसलाई बेचेर खर्च टार्ने गरेको सरकारी वकिलको कार्यालयमा बयान दिएका छन् ।
साउन २१ गते साइकल चोरेको आरोपमा पक्राउ परेका धरान उपमहानगरपालिका– ८ का ३२ वर्षीय क्षेत्रीले आफूले कबाड सामान टिपी बेचेर गुजारा गर्दै आएको बताएका छन् । उनले काठमाडौं–२६ पवित्रनगरबाट घरको प्यासेजमा रहेको १५ हजार रुपैयाँ पर्ने गियर भएको बच्चाले चलाउने साइकल चोरी गरेर कबाड किनबेच गर्ने व्यक्तिलाई दुई हजारमा बेचेपछि यो रहस्य खुलेको हो ।
चार महिना अघि चोरी तथा आपराधिक उपद्रव मुद्दामा कारगारबाट छुटेका उनले आफ्नो खर्च टार्न चोरी गरेको उनले सरकारी वकिलको बयानमा बताएका छन् । अनुसन्धानको क्रममा उनले त्यसको दुई दिनअघि २३ गते नयाँबसपार्कको गोरखकाली मोटर वर्कसपबाट झोला चोरी गरी त्यही झोलाको टिर्सट लगाएर साइकल चोरी गरेको समेत देखिएको छ ।
सरकारी वकिल कार्यलय काठमाडौंले उनीविरुद्ध काठमाडौं जिल्ला अदालतमा चोरी सम्बन्धी कसुरमा अभियोग पत्र दायर गरेको छ । कानुन अनुसार उनलाई तीन वर्षसम्म कैद र तीस हजार रुपैयाँसम्म जरिवानाको सजाय माग गरिएको छ । साथै, चोरी भएको सम्पत्ति पीडितलाई क्षतिपूर्ति दिलाउन अभियोग पत्रमा भनिएको छ । क्षेत्री यस अघि जिल्ला प्रशासन कार्यलयमा २०७८ सालमा अभद्र व्यवहारमा ६ हजार ३ सय रुपैयाँ, २०७५ मा पुन ४ सय २५ रुपैयाँ र सोही साल प्रहरी वृत्त बालाजुमा नै ३ सय ७५ रुपैयाँ जरिवाना तिरेर छुटेका थिए ।
