काठमाडौँ — ललितपुर महानगरले आर्थिक वर्ष २०८२/०८३ का लागि ७ अर्ब ४७ करोड ४१ लाख ४७ हजारको बजेट ल्याएको छ ।
चालु खर्चतर्फ २ अर्ब ९६ करोड ६४ लाख १८ हजार र पुँजीगततर्फ ४ अर्ब ५० करोड ७७ लाख २९ हजार विनियोजन गरिएको छ । महानगरकी उपप्रमुख मञ्जली शाक्य बज्राचार्यले नगरसभामा बजेट प्रस्तुत गरेकी हुन् ।
ललितपुर महानगरले समृद्धि र सुशासन सम्पदा र संस्कृति संरक्षण , दिगो पूर्वाधार, हरियाली प्रवर्द्धन , पर्यावरण, आत्मनिर्भर अर्थतन्त्र , गुणस्तरीय शिक्षा, घर घर स्वच्छ खानेपानी, सामाजिक विकास, स्वास्थ्य युवा रोजगारलगायतका क्षेत्रलाई बजेटले प्राथमिकता दिएको छ ।
चालु आर्थिक वर्षको तुलनामा ललितपुरले १ करोड रुपैयाँ बढीको बजेट ल्याएको हो । चालु आर्थिक वर्षका लागि ललितपुरले ७ अर्ब ४६ करोड ८३ लाख ९२ हजार बजेट ल्याएको थियो ।
