काठमाडौँ — नैतिकता, सदाचार, अहिंसा र विश्व शान्तिका लागि प्रारम्भ भएको अणुव्रत आन्दोलन स्थापनाको ७७ वर्ष पूरा भएको छ । उक्त अवसरमा नेपाल अणुव्रत समितिले शनिबार काठमाडौँमा एक समारोहका बीच विचार गोष्ठी गरेको छ । जैन श्वेताम्बर तेरापन्थ धर्मसंघका आचार्य श्री तुलसीले ७७ वर्ष अगाडि अणुव्रत आन्दोलनको शुभारम्भ गरेका थिए ।

त्यसयता जैन समुदायले नैतिकता, सदाचार, अहिंसा र विश्व शान्तिका लागि एउटा आन्दोलनकै रुपमा उक्त अभियानलाई अगाडि बढाउँदै आएका छन्। शनिबार कमलपोखरीस्थित जैन भवनमा भएको कार्यक्रममा प्रतिनिधिसभा सदस्य प्रतिमा गौतमले जैन समुदायले मान्दै आएको अणुव्रत अभियान सबै मानव जातिका लागि अनुकरणीय रहेको बताइन्।

विश्व मानव समुदायले नै अनुसरण गर्न योग्य उक्त अभियानबाट स्थापित मान्यताहरूलाई प्रचार प्रसार गर्न आवश्यक रहेको उनको भनाइ थियो । 'नेपाल बहुभाषिक, बहुधार्मिक र बहुसांस्कृतिक समुदाय भएको देश हो,' उनले भनिन्, 'अणुव्रतको सन्देश सबै धार्मिक, सांस्कृतिक समुदायको सामाजिक जीवनका लागि त्यतिकै उपयोगी छ।' अहिले पनि मारवाडी समुदाय अणुव्रतमा विश्वास राख्दछन् । उनीहरूले वध गर्दैनन् र पूर्ण शाकाहारी जीवन बाँच्दछन्।