जनकपुर — हुलाकी राजमार्गअन्तर्गत कमला खोलामा निर्माण नसकिदै भत्किएको पुल निर्माणमा प्रदेश सरकारले चासो नदेखाएको भन्दै सोमबार जनकपुरस्थित मधेश प्रदेशसभा घेराउ गरिएको छ । 

नयाँ कमला पुल निर्माण संघर्ष समिति सिरहा र धनुषाले सोमबार प्रदेशसभाको मुख्य गेटमा प्रदर्शन गर्दै नाराबाजी गरेका हुन् । सोमबार प्रदेशसभाको बैठकमा नीति तथा कार्यक्रममाथि छलफल चलिरहेको बेला संघर्ष समितिले घेराउ गरेको हो । ‘लाज लाग्दैन । नयाँ कमला पुल कहिले सुरु हुन्छ ?’ लेखिएको तुल बोकेर प्रदेशसभा घेराउ गरेको संघर्ष समितिले मधेश प्रदेश सरकारसँग सोधेको छ,‘कहिलेसम्म संघको मुख हेरेर बस्ने, प्रदेश सरकार हो कि संघ सरकारको शाखा हो ।’

नयाँ कमला पुल संघर्ष समितिका प्रविण यादवले संघीय सरकारको उपेक्षामा परेको कमला पुल प्रदेश सरकारको प्राथमिकतामा नपर्दा खबरदारी गरेको बताए ।