राजविराज — सार्वजनिक जग्गामा बनाएका घरटहरा भत्काउन सप्तरीको तिलाठी कोइलाडी गाउँपालिका–३ वडा कार्यालयले सूचना जारी गर्दादेखि नै तनाबमा थिइन्, रत्नीदेवी मलाहनी (मुखिया)। 

७५ वर्षकी रत्नीदेवीलाई छोरा–बुहारी र नाती–नातीनी घरविहीन भएपछि चर्को घाम र बढ्दो गर्मीमा कहाँ बस्ने भन्ने चिन्ता भइरहेको थियो । गत सोमबार बिहान वडाध्यक्ष रमेशकुमार मुखियालगायतकाले ‘डोजर’ लिएर घर भत्काउन पुग्दा पनि रत्नीदेवीले ओत लाग्ने ठाउँको व्यवस्थापन नभएसम्म घर नभत्काउन आग्रह गरिरहिन् । तर, कसैले मानेनन् ।

गत वैशाख २१ मा गरिएको ७ दिने सूचना टेकेर ४ पुस्तादेखि सकरपुरा टोलमा बसोबास गरिरहेकी रत्नीदेवीका छोराहरु परमेश्वर, विन्देश्वर र लक्ष्मी मुखियाको घर भत्कायो । घर भत्काउँदा ४ दिनदेखि छोरा–बुहारी र नातिनातिनाहरु भत्काइएका संरचनामाथि र सडक किनारमै त्रिपाल टाँगेर रात काट्न बाध्य हुँदा उनी बेचैन थिइन् । ‘घर भत्काएपछि आमा एकदमै चिन्तित हुनुहुन्थ्यो, झन् बालबच्चालाई त्रिपालमूनि गर्मीमा समस्या भइरहेको हेर्दा आमालाई पिरोलिरहेको थियो,’ उनका छोरा विन्देश्वरले भने, ‘खाना खान पनि मान्नुहुदैन्थ्यो । बालबच्चालाई हेरेरै रात बिताउनुहुन्थ्यो ।’

४ दिनदेखि खाना खानसमेत रुचि नलागेको भन्दै आएकी रत्नीदेवीको बिहीबार राति निधन भएको हो । ‘सासुआमालाई धेरै सम्झाए तर उहाँ चिन्ता कम गर्न सकिन,’ उनकी बुहारी सुशीला मुखियाले भनिन्, ‘अन्तिम समयमे सेहो तुसब कत: बैइठबी–सुतबी कहीक चिन्ता करहल छलनि (अन्तिम समयमा पनि तिमीहरु कहाँ बस्छौं–सुत्छौं भनेर चिन्ता गर्दै हुनुहुन्थ्यो)।’ 

उनको निधनपछि गाउँले नै शोकमग्न छन् । अझ बेघर भएको बेला रत्नीदेवीको निधन भएपछि सुकुमवासी परिवारमाथि पीडा थपिएको छ । शुक्रबार बिहान त्यहाँ पुग्दा घर भत्काएको आँगनमा रत्नीदेवीको शव राखेर उनीहरुले आक्रोश पोखिरहेका थिए । ‘हामीले फरक पार्टीलाई भोट दिएका थियौं, त्यसैको प्रतिसोध साध्न वडाध्यक्ष मुखियाले आफुसहित ७ परिवारका घर भत्काइदियो,’ विन्देश्वरले भने, ‘यहाँ अधिकांशका घर सार्वजनिक जग्गामै छन् तर हाम्रोबाहेक कसैको पनि भत्काइएन, त्यही कारणले आमालाई पनि गुमाउनुपर्‍यो ।’