राजविराज — आमाको ‘हत्या’पछि सप्तरीको तिलाठी कोइलाडी गाउँपालिका–५, बनरझुलाकी १२ वर्षीया काजलकुमारी राय निदाउन सकेकी छैनन् । एक सातासम्म बेपत्ता पारिएकी उनकी ३६ वर्षीया आमा अनितादेवीको शव गत बुधबार कोशी नदीको पश्चिमी किनारमा हातखुट्टा बाँधिएको अवस्थामा भेटिएको थियो । गलिसकेको आमाको शव अझै उनको आँखै अगाडि घुमिरहँदा काजल निदाउन पाएकी छैनन् । 

आइतबार त्यहाँ पुग्दा घरअगाडि बसिरहेकी किरियापुत्री काजल आमाको तस्बिर नियाल्दै न्यायका लागि बर्बराइरहेकी थिइन् । ‘त्यो राति म जन्ती नगएको भए हुन्थ्यो, आमा घरमा एक्लै भएर हत्या गरिदियो,’ उनी भन्छिन्, ‘आमाको हत्यारालाई पनि छोड्नुभएन ।’ बोलिरहँदा उनको आँखा आँसुले भरिएको थियो । उनकी आमा बेपत्ता पारिएपछि जन्तीमा रहेकी काजललाई फोनमा ‘गाई हराइसकेको’ भनी बोलाएका थिए । तर, घर फर्किंदा गाई गोठमै देखेपछि उनले आमालाई खोज्दै पटक–पटक छिमेकी र गाउँलेसँग सोधिरहिन् ।

उनका बुवा वीरेन्द्र छुट्टीमा फर्किएर ३ महिनाअघि मात्रै फेरि वैदेशिक रोजगारीका लागि कतार पुगेका थिए । काजलकी दिदी घरमा रहँदा उनी आमासँगै घरमा बस्दै आएकी थिइन् । तर, अघिल्लो बुधबार (२३ वैशाख) काजल जन्तीमा अमर्बा टोल पुगेकी थिइन् । त्यही राति उनकी आमा अनितादेवीलाई ५/७ जनाको समूहले घरबाटै बेपत्ता पारेका थिए । भोलिपल्ट अनितादेवीलाई घरमा नदेखेपछि छिमेकीले खोजी सुरू गरेका थिए । 

घरभित्र रगतका छिटा देखिएपछि उनीहरूले नै प्रहरीलाई जानकारी गराएर काजललाई पनि फोन गरेर बोलाएका थिए । गाउँले र प्रहरी मिलेर खोज्दै जाँदा गत बुधबार अनितादेवीको शव सोही वडाको ९ किलोमिटर भन्ने ठाउँमा कोशी नदीमा भेटिएको थियो । ‘भाउजू (अनितादेवी)कै साडीले घाँटी कसेको, हात–खुट्टा बाँधिएको तथा खुट्टा र टाउकोतिर १०/१२ किलोको ढुंगा बेरिएको अवस्थामा शव भेटियो,’ मृतककी नन्द राधा रायले भनिन्, ‘घेरिएको बाटो खुलाइदिन भाउजूले पटक–पटक छिमेकीलाई भन्दै आएको निहुँमा छिमेकीले नै घरमा कोही नरहेको मौका छोपेर हत्या गरिदियो ।’