पर्सा — विशेष आर्थिक क्षेत्रको सिमराको स्वामित्वको ४ सय ९० बिघा जग्गा अतिक्रमणमा परेको छ । विशेष आर्थिक क्षेत्र परिसरमा कूल ८ सय ३३ बिघा जग्गा रहेकोमा विशेष आर्थिक क्षेत्र प्राधिकरणको भोगचलनमा हाल ३ सय ४३ बिघा मात्र जग्गा रहेको छ । 

प्राधिकरणका साइट इन्चार्ज इन्जियर पप्पु गिरीका अनुसार आर्थिक क्षेत्र सन्चालनमा आएदेखि नै अतिक्रमित रहेको जग्गा र त्यहाँ निर्माण गरिएका घरटहरा हटाउने प्रयास गरिए पनि त्यो असफल हुँदै आएको छ । साबिकमा वीरगन्ज चिनी कारखानाको स्वामित्वको यो जग्गापछि देशकै पहिलो विशेष आर्थिक क्षेत्र निर्माणका लागि आर्थिक वर्ष २०६२/०६३ मा उद्योग मन्त्रालयलाई हस्तान्तरण गरेको थियो ।

त्यसपछि उद्योग मन्त्रालयले २०६४/०६५ बाट विशेष आर्थिक क्षेत्र आयोजना, त्यसपछि विशेष आर्थिक क्षेत्र विकास समिति र हाल बिशेष आर्थिक क्षेत्र प्राधिकरणमार्फत यसलाई सन्चालन गरिरहेको छ । 

कूल ८ सय ३३ बिघा जग्गा ए देखि इसम्म गरेर ५ वटा ब्लकमा बिभाजित रहेको छ । ए ब्लकको ३ सय ४३ बिघाबाहेक बाँकी सबै जग्गा हाल अतिक्रमणमा परेको छ । विसं २०२० सालमा वीरगन्ज चिनी कारखाना स्थापना हुँदा उक्त जग्गा कारखानाले उखु खेतीका लागि खरिद गरेको थियो । त्यतिबेला कारखाना व्यवस्थापनले उखु खेती प्रयोजनका लागि केही मजदुर त्यहाँ राखेकोमा ती मजदुरले घरटहरा निर्माण तथा खेतीपातिका लागि समेत गरी ६/६ कठ्ठा जग्गा पाएका थिए । 

उनीहरुले अस्थायी रुपमा पाएको जग्गा हालसम्म पनि प्रयोग गरिरहेका छन् । ती मजदुरका सन्तान बढेर छुट्टिएपछि तथा बाहिरका समेत केही व्यक्ति आएर आर्थिक क्षेत्रको जग्गामा बसोबास गरेर खेतीपाती गरिरहेका छन् । हाल आर्थिक क्षेत्रको जग्गामा झण्डै ६ सय घरटहरा समेत निर्माण भइसकेका छन् । वीरगन्ज चिनी कारखाना हाल खारेज भइसकेको छ । त्यहाँका कर्मचारीहरु पनि अवकाशमा गइसकेका छन् ।