राजविराज — सप्तरीमा दलित समुदायमाथि जघन्य अपराध हुँदा पनि प्रहरीले गम्भीरता नदेखाएको भन्दै प्रधानमन्त्रीलाई ज्ञापनपत्र बुझाइएको छ । दलित अगुवाहरूले आइतबार राजविराजमा प्रदर्शन गर्दै प्रमुख जिल्ला अधिकारीमार्फत प्रधानमन्त्रीलाई ज्ञापनपत्र बुझाएका हुन् ।

‘संविधानले नागरिकलाई जात, वर्ग, लिङ्गका आधारमा विभेद नगरी समानता, सुरक्षा र न्यायको अधिकार सुनिश्चित गरेको छ,’ ज्ञापनपत्रमा भनिएको छ, ‘तर, व्यवहारमा दलितमाथि निरन्तर भइरहेको जघन्य अपराधले संविधानको मर्ममाथि नै गम्भीर प्रहार भइरहेको यथार्थलाई अस्वीकार गर्न सकिँदैन ।’

ज्ञापनपत्रमा गत वैशाख १ गते राति घरबाटै बेपत्ता पारिएकी सुरुङ्गा नगरपालिका–७ हरिपुरकी १८ वर्षीया पूजाकुमारी राम भोलिपल्ट हत्या गरेको अवस्थामा भेटिँदा पनि पीडित परिवारले अहिलेसम्म न्याय नपाएको उल्लेख छ ।

‘एक वर्ष बित्न लाग्दा पनि अपराधी पत्ता नलाग्नुले प्रहरी र प्रशासनप्रति अविश्वास तथा घटनालाई ढाकछोप गर्न लागिएको आशंका भइरहेको छ,’ पत्रमा भनिएको छ । सोही पत्रमा चैत्र १ गते सोही नगरपालिका वडा नं.३ मा ८ वर्षदेखि बालश्रममा लगाइएकी १४ वर्षीया दलित बालिकालाई गर्भवती बनाएपछि बेपत्ता पारिएको घटना पनि उल्लेख गरिएको छ । घटनाका आरोपीहरू महेश्वर यादव र महेश्वरका सहयोगी धर्मदेव यादव अझैसम्म पक्राउ नपरेको तथा पीडितलाई बयान बदल्न धम्क्याइरहेको उल्लेख गर्दै दोषीलाई उन्मुक्ति दिने खतरनाक अवस्था सिर्जना गरेको पत्रमा दाबी गरिएको छ ।