सर्लाही — बाढीले भत्काएको सडकमा कल्भर्ट निर्माणको काम स्थानीयको अवरोधका कारण रोकिएको छ । हुलाकी सडक आयोजनाले ठेक्का लगाएर कल्भर्ट निर्माण भइरहेको हो । स्थानीयले कल्भर्ट भन्दा अघि तटबन्ध निर्माण गरिनुपर्ने माग गर्दै काम रोकेका हुन् । 

गत असोजमा लखन्देही र ढंग्रा खोलाको बाढीले सर्लाहीस्थित कौडेना गाउँपालिका–३ पर्सामा हुलाकी सडक बगाएको थियो । सडकले कटान गरेको ठाउँमा आयोजनाले तलबाट पानी निकास हुने गरी बक्स कल्भर्ट बनाउने काम सुरु गरेको थियो । 

असोज २१ मा सबै सरोकारवालाको उपस्थितिमा भएको छलफलको निर्णय अनुसार कल्भर्ट निर्माणको काम धमाधम भइरहेकोमा केही दिनदेखि स्थानीयले पहिले नदीमा तटबन्धको काम हुनुपर्ने माग गर्दै निर्माण रोकेका हुन् । 

२०८२ माघ २७ मा सुशमा आदित्य विजय निर्माण सेवा उदयपुरले २०८३ असार २५ सक्ने गरी ३ करोड ५३ लाख ३ हजार २३ रुपैयाँमा ठेक्का पाई कल्भर्टको काम अघि बढाएको थियो । 

स्थानीयले कौडेनादेखि चक्रघट्टासम्म करिब डेढ किलोमिटर तटबन्ध निर्माणको माग गरेका छन् । कौडेना–३ का रविन्द्र राय यादवले खोलामा तटबन्ध नै नगरी हुलाकी सडकमा पानीको निकास गर्न खोजेकाले काम अवरोध गर्नुपरेको बताए । उनले खोलामा तटबन्ध हुनुपर्ने स्थानमा हुलाकी सडकमा पानीको निकासले दक्षिण क्षत्रका बस्ती जोखिममा पर्ने बताए । ‘खोलामा तटबन्ध हुनपर्ने स्थानमा हुलाकीको पानी निकासकालागि मात्र काम भएको छ, यसले दक्षिणी क्षेत्रका बस्ती जोखिममा पर्छ, त्यसैले हामीले काम रोकेका हौं,’ उनले भने, ‘वर्षा याममा तटबन्ध नै दिगो समाधानको उपाय हो, तटबन्ध नगर्दा हाम्रो बस्ती सहित खेतबारी जोखिममा छ ।’ 

उत्तर पश्चिमतर्फबाट बर्सेनि बाढी पस्ने गरेको भन्दै स्थानीयले कल्भर्ट निर्माणमा अवरोध गरेपछि हुलाकी सडक आयोजनाका ईन्जिनियर रन्जित यादव, जलस्रोत तथा सिँचाइ विकास चन्द्रनिगाहपुरका प्रमुख अनुभव चौधरी, कौडेना गाउँपालिका अध्यक्ष रुपेश कुमारलगायतको टोलीले अनुगमन गरेको छ ।