स्वास्थ्य कार्यालय परिसर नै दुर्गन्धित भएर रोग लाग्नसक्ने चिन्ता गर्ने उनी प्रतिनिधिमूलक पात्र मात्रै हुन् । यहाँ दैनिक ७/८ जना सेवाग्राही क्षयरोग पहिचान गराउनका लागि खकार बोकेर आउने गर्छन् । तर, दुई महिनाभन्दा बढी समयदेखि डायलासिसको ‘लिक्विड वेस्ट’ (डायलाइजर मेसिनले रगतबाट छानिएको फोहोर) ले कार्यालय परिसर दुर्गन्धित छ । दुर्गन्धले सेवाग्राही नाक थुनेर सेवा लिन बाध्य छन् भने सेवाग्राही र त्यस आसपासका स्थानीयमा रोग सर्ने चिन्ता बढाएको हो । 

गजेन्द्रनारायण सिंह अस्पतालमा हुने डायलासिसबाट निस्किने ‘लिक्विड वेस्ट’ परिसर भएर बगिरहँदासमेत स्वास्थ्य कार्यालयले व्यवस्थापन गराउन सकेको छैन् । दुर्गन्धले जनस्वास्थ्यमा नकारात्मक प्रभाव पार्नसक्ने भन्दै स्वास्थ्य कार्यालयका प्रमुख डा.सतिशकुमार यादवले अस्पताललाई काटेको पत्रमै उल्लेख छ । तर, पत्र काटेको दुई साताभन्दा बढी समयसम्म पनि अस्पतालले टेरेको छैन् । अस्पतालका सूचना अधिकारी दिपेन्द्र यादवले फोहोर पानी व्यवस्थापन गर्नका लागि संरचना निर्माण भइरहेको बताए । ‘सम्भवत: आइतबार/सोमबारसम्म व्यवस्थापन गरिसक्छौं’, उनले भने ।