सिरहा — सिरहामा ट्राफिक नियम उल्लंघनको आरोपमा प्रहरीले तीनजनालाई निर्घात कुटपिट गरेको छ । सिरहा-चोहर्वा सडकअन्तर्गत नरहा चोकमा तीन जनालाई लखेटी-लखेटी प्रहरीले कुटपिट गरेको हो ।

इलाका प्रहरी कार्यालय, नरहाका इन्चार्ज प्रहरी नायब निरीक्षक राजकिशोर साहसहितका प्रहरी, सशस्त्र प्रहरी र निर्वाचन प्रहरीले उनीहरूमाथि कुटपिट गरेका हुन् । कुटिनेमा गोलबजार नगरपालिका-८ चोहर्वाका २४ वर्षीय बैजु मुखिया र अर्का दुई व्यक्ति छन् । कुटिनेमध्येका बैजुका अनुसार, नरहा चोकमा नेपाल प्रहरी र सशस्त्र प्रहरीले गरिरहेको संयुक्त जाँचका क्रममा लाइसेन्स भए पनि ब्लु बुक नहुँदा प्रहरीले उनको मोटरसाइकलको साँचो खोसेको थियो । त्यसपछि मोबाइलमा ब्लु बुकको फोटो मोबाइलमा देखाएपछि प्रहरीले उनलाई जान दिएको थियो । 

तर, त्यहाँबाट थोरै अगाडि बढेपछि सई साहले आफूलाई रोकेर चार-पाँच थप्पड हानेको बैजुको भनाइ छ । 'मोबाइलमा ब्लु बुक देखाएँ, अनि जरुरी काममा जाँदैछु भनेर आग्रह गर्दा म्यादी प्रहरीले जान भन्यो,' उनले भने, 'तर, दुई वटा तारा भएको र बर्दीमा आरके साह लेखिएको सरले केही बुझ्दै नबुझी मलाई रोकेर थप्पडले हिर्काउनुभयो ।'

बैजुलाई सई साहले कुटपिट गरेको भए पनि अर्का दुई जनामध्ये एक जनालाई ३-४ जना प्रहरी मिलेर लठ्ठी र बुटले निर्मम ढंगले कुटपिट गरिरहेको सामाजिक सञ्जालमा सार्वजनिक भएको भिडियोमा देख्न सकिन्छ । बैजुलाई सई साहले कुटिरहेकै समयमा अर्को मोटरसाइकलमा तीन जना सवार भएर आइपुगेका थिए ।

प्रहरीलाई देख्नेबित्तिकै सडक छेउमै मोटरसाइकल छाडेर खेततिर भागेका उनीहरूमध्ये एकजना उम्किन सफल भए भने अन्दाजी २१ वर्षीय चालक र बीचमा बसेका ३० वर्षीय अर्का व्यक्तिलाई प्रहरीले लखेट्दै निर्मम कुटपिट गरेका हुन् । जसमा बढी चोटपटक ३० वर्षीय व्यक्तिलाई लागेको बैजुले बताए ।