रौतहट — झण्डै एक महिना धाउँदा पनि नागरिकता पाउन नसकेको भन्दै आइतबार चन्द्रपुर नगरपालिका–१ का सेवाग्राही इलाका प्रशासन कार्यालय चन्द्रनिगाहपुरमा धर्ना बसेका छन् ।

चन्द्रपुर–१ वडाअध्यक्षसहित सेवाग्राहीहरु आइतबार ईलाका प्रशासन कार्यालयको मूल ढोकामै धर्नामा बसेका हुन्।

चन्द्रपुर–१ की निमालाम्हु भुटियाले एक महिना धाउँदा पनि ईलाका प्रशासन प्रमुख माधवप्रसाद शर्माले बिभिन्न बाहना बनाएर दुःख दिएको भन्दै धर्नामा बसेको बताइन् । ‘निवेदन दिएको पनि एक महिना हुन लाग्यो । नागरिकताको लागि धाउँदै सकस हुन लाग्यो,’ उनले भनिन्,‘यो त हदै भयो । सेवाग्राहीलाई यसरी दुःख दिन कतिको उचित होला ।’ 

जिल्ला प्रशासन कार्यालयले गत माघ २० मा निमालाम्हुलाई नागरिकता नदिइनुको कारण सोध्दै सोही कार्यालयबाट नागरिकता दिने व्यवस्था मिलाउन पत्राचार गरेको थियो । उक्त पत्रको ईलाका प्रशासन प्रमुख शर्माले अवज्ञा गर्दै आफुले कुनै हालतमा नागरिता दिन नमिल्ने बताएको निमालाम्हुले बताइन् । उनले जिल्ला प्रशासन कार्यालय गौरबाटै नागरिकता बनाउनु भनेर पन्छिन खोजेको निमालाम्हुले सुनाइन् ।

इलाका प्रशासन प्रमुख शर्माले नागरिकता दिन आनाकानी गरेपछि वडाअध्यक्ष बलराम राउत र निवेदक निमालाम्हुसहितका स्थानीय धर्नामा बसेका हुन् । दुःख दिने नियतले इलाका प्रशासन प्रमुख शर्माले नागरिकता दिन नखोजेको वडाअध्यक्ष राउतले बताए । वडा कार्यालयबाट सिफारिस भई सबै प्रक्रिया पूरा गरेर पनि नागरिकता नदिएको उनीहरुको आरोप छ । झण्डै आधा घण्टा धर्नामा बसे पछि उनीहरु प्रमुखको कार्यकक्ष पुगेर सोमबार १२ बजेसम्मको अल्टिमेटम दिएका छन् ।