राजविराज — सप्तरीको कठौना–पातो–फत्तेपुर–कटैया सडक निर्माण सुरु भएको झण्डै ८ वर्ष भइसक्यो । तर, अझै कालोपत्र हुन सकेको छैन् ।

कुशहा नाकासम्मका लागि सर्वसाधारणलाई पूर्वपश्चिम राजमार्गमा जोड्नका लागि हुलाकी सडकको सहायक सडकका रुपमा ४ जेठ ०७५ मा नै निर्माण सुरु भएको थियो । कान्छाराम–बागमती-देव एण्ड सायर ‘जोइन्ट भेन्चर’ले भ्याटसहित ७० करोड ४४ लाख रुपैयाँमा ठेक्का पाएको उक्त सडक १७ मंसिर ०७७ सम्म बन्नुपर्ने थियो । तर, पटक–पटक म्याद थप भएर पनि कालोपत्र कार्य पूरा हुन सकेको छैन् । 

१८ किलोमिटरको उक्त सडक कालोपत्र नहुँदा सुक्खायाममा धुलाम्य र वर्षामा हिलाम्य रहँदा सर्वसाधारणलाई सास्ती भइरहेको छ । ‘क्षेत्र नम्बर ३ मा पर्ने मूल सडक नै यही हो, सधैं चुनावी एजेन्डा पनि बन्छ तर ८ वर्षमा पनि कालोपत्र हुन सकेन,’ अब्दुल खारिद जोशीले भने, ‘अहिले गाडी चल्दा धुलाम्य सडकले घर बाहिर निस्किन सक्ने अवस्था पनि छैन् ।’ सडक आसपासका घरमा पनि धुलो पसेर हैरानी भइरहेको उनले गुनासो गरे । 

अहिले फेरि यही सडकलाई एजेन्डा बनाएर भोट बटुल्न नेताहरु घरदैलोमा आइरहेको मिथिलेशप्रसाद साहले बताए । ‘यसअघि जितेर गएका र अन्य नेताहरुसित पहल गरिदिनका लागि पटक–पटक आग्रह गर्दा पनि निर्माण कार्य अघि बढाउन कसैले पहल गरिदिएन,’ उनले भने, ‘एउटै सडकका लागि कतिपटक भोट हाल्नुपर्ने हो π अब जवाफ दिनुपर्छ ।’ 

०७० र त्यसअघिका निर्वाचनको बेला पनि उम्मेदवारका लागि यो सडक चुनावी एजेन्डा रहने गरेको स्थानीयको भनाइ छ । ०७४ मा तत्कालीन राष्ट्रिय जनता पार्टी (राजपा) बाट प्रतिनिधिसभा सदस्य निर्वाचित भएका स्वर्गीय चन्द्रकान्त चौधरीको मूल एजेन्डामध्येका एक थियो, कठौना–पातो–फत्तेपुर–कटैया सडक ।

उनी निर्वाचित भएको केही महिनापछि सडक निर्माण कार्य सुरु भए पनि तोकिएको अवधिमा पूरा हुन सकेन । 
०७९ मा पनि सोही सडक उनको चुनावी एजेन्डाको प्राथमिकतामा थियो । तर, उनी पराजित हुन पुगे । ०७४ मा दोस्रो स्थानमा मत ल्याएका कांग्रेसका दिनेशकुमार यादव ०७९ मा निर्वाचित भए । त्योबेला एमालेबाट चुनाव लडेका चन्द्रकान्तकै भाई ताराकान्त चौधरी भने दोस्रो स्थानमा रहे ।

अहिले दोस्रो कार्यकालका लागि चुनाव लडेका दिनेशकुमारको यसपटक पनि यही सडक नै मुख्य एजेन्डामध्येको एक हो । ती सडकसहित अधूरा रहेका गाईघाट–शम्भुनाथ–बनैनिया सडक, रुपनी–सिम्राहा सिंग्यौन–फकिरा–बरदाहीलगायतका सडक निर्माणमा पहल गर्ने उनको भनाइ छ ।

‘संसदमा कुरा उठाएर तथा पहल गरेर केही सडकको निर्माण कार्य अघि बढाउन सके पनि अझै केही अधुरा सडकको निर्माण कार्य र योजना कार्यान्वयन गराउन बाँकी छ,’ उनले भने, ‘त्यसका लागि सांसद रहँदा नै मन्त्रालय, हुलाकी सडक आयोजना, विभाग, राष्ट्रिय योजना आयोगसँग छलफल गरी धेरै काम गरिसकेको छु।’