बारा — जिल्ला प्रशासन कार्यालय बाराले बाबुको पहिचान नखुलेका नागरिकलाई आमाको नामबाट नागरिकता दिन सुरू गरेको छ । बिहीबार पहिलो दिन २ जनालाई अंगीकृत नागरिकता दिइएको सहायक प्रमुख जिल्ला अधिकारी छविरमण भट्टराईले बताए । उनकाअनुसार कलैया उपमहानगरपालिका-५ की कान्तीदेवी कुर्मीको छोरा सुरत राउत र वडा नम्बर ४ की चन्दकुमारी क्षेत्रीका छोरा सागर सिंहलाई आमाको नामबाट अंगीकृत नेपाली नागरिकताको प्रमाणपत्र दिइएको छ । उनीहरू दुवैलाई प्रमुख जिल्ला अधिकारी धर्मेन्द्रकुमार मिश्रले नागरिकता दिएका हुन् । 'नागरिकता पाएपछि उनीहरूले खुसीको आँसु झारे,´ सहायक प्रमुख जिल्ला अधिकारी भट्टराईले भने, 'हातमा नागिरकता लिएपछिको उनीहरू भावुक थिए ।´ 

नेपाल नागरिकता (दोस्रो संशोधन) ऐन, २०६३ तथा नेपाल नागरिकता नियमावली (चौथो संशोधन), २०६३ अनुसार उनीहरूलाई नागरिकता प्रदान गरिएको हो । `बाबुको पहिचान खुल्ने खालको कागजपत्रहरू कहींकतै नखुलेको खण्डमा आमाको नामबाट अंगीकृत नागरिकता दिन सुरू गरिएको हो,´ उनले भने, `१२ जना अझै `पाइपलाइन´मा छन् । उनीहरूको सबै कागजात बुझ्ने काम भइरहेको छ ।´