राजविराज — हत्या अभियोगको आरोपपछि अदालतमा हाजिर भएका सप्तरीको राजगढ गाउँपालिकाका अध्यक्ष ओमप्रकाश मण्डल बिहीबार धरौटीमा रिहा भएका छन् । उनी बुधबार बिहान अदालतमा हाजिर भएका थिए । बुधबार र बिहीबार भएको बहसपछि उनी धरौटीमा रिहा भएका हुन् ।

अदालतका न्यायाधीश रोमनाथ अधिकारीको दुई नम्बर इजलासमा भएको बहसपछि उनलाई दुई लाख रुपैयाँ धरौटी तिर्न आदेश भएको अदालतका सूचना अधिकारी उमेशकुमार अर्यालले बताए 

३ साउन २०५५ मा तत्कालीन बेल्ही चपेना गाविस–३ स्थित रामजानकी मन्दिरका पुजारी जन्त्रीदास बैरागीको हत्या भएको थियो । सो मुद्दामा पालिका  मण्डलसहितका सात जनाविरुद्ध १५ वैशाख ०७८ मा पक्राउ पुर्जी जारी भएको थियो ।

पक्राउ पुर्जी जारी रहेकै बेला मण्डल ३० वैशाख ०७९ मा स्थानीय तह निर्वाचनमा नेकपा एमालेबाट अध्यक्षमा निर्वाचित भएका थिए । उनी निर्वाचित भएको झन्डै १० महिनापछि १४ फागुन ०७९ मा जिल्ला अदालतका न्यायाधीश हेमन्त रावलले मुद्दा मुल्तबीमा राखेका थिए ।