पर्सा — सीमावर्ती जिल्लामा पछिल्लो केही समययता नक्कली नोटको कारोबार तीव्र रूपमा बढ्दै गएको भन्दै नेपाल राष्ट्र बैंकले गम्भीर चासो व्यक्त गरेको छ। राष्ट्र बैंक वीरगन्ज शाखाले बुधबार वीरगन्जमा पत्रकार सम्मेलन गरी नक्कली नोट पहिचान, वित्तीय ठगी तथा साइबर अपराधबाट बच्ने उपायबारे सुझाएको छ।

पत्रकार सम्मेलनमा शाखा प्रबन्धक सुशील पौडेलले हालका दिनहरूमा विशेष गरी १ हजार दरका नक्कली नोट भेटिन थालेकाले सर्वसाधारण सचेत हुनुपर्ने बताए । उनले प्रारम्भिक अवस्थामा सीमित संख्यामा देखिएका नक्कली नोटको यो समस्या हाल ठूलो बन्दै गएकाले जोखिम झनै बढेको बताए ।

पत्रकार सम्मेलनमा नक्कली नोट कसरी चिन्ने भन्नेबारे पनि जानकारी दिइएको थियो । शाखाका अधिकृत नरेश सर्राफले नक्कली नोटमा सुरक्षा धागो र वाटरमार्क स्पष्ट नदेखिने, कागजको गुणस्तर कमजोर हुने, अक्षर र रंग फिक्का देखिने जस्ता लक्षण हुने बताए ।